विराटचोकः देशका ७५३ स्थानीय तहमध्ये अझै पनि एउटा पालिकामा कुनै पनि वाणिज्य बैंकको शाखा बिस्तार भएको छैन । बझाङ जिल्लाको साइपाल गाउँपालिका वाणिज्य बैंक नपुगेको नेपालको एक्लो पालिका हो ।
सडक, सञ्चार, सुरक्षालगायतका पूर्वाधार स्थानीयस्तरसम्म उपलब्ध नभएको कारण देखाउँदै बैंकहरुले शाखा विस्तार गर्न आनाकानी गरेका हुन् । नेपाल राष्ट्र बैंकले सबै स्थानीय तहमा शाखा खोल्न निर्देशन दिएको ६ वर्ष हुँदा पनि उक्त गाउँपालिकामा भने बैंकको शाखा खुल्न सकेको छैन । देश संघीय संरचनामा गएपछि गठन भएका ७५३ स्थानीय तहमा आर्थिक वर्ष २०७४–७५ को असार मसान्तभित्र आफ्नो शाखा खोल्न नेपाल राष्ट्र बैंकले वाणिज्य बैंकहरुलाई निर्देशन दिएको थियो । केन्द्रीय बैंकको निर्देशनपछि वाणिज्य बैंकहरुले तदारुकता पनि देखाए । बैंकहरुले स्थानीय तहमा भागबण्डा नै गरेर शाखा विस्तार अगाडि बढाए ।
राष्ट्र बैंकले २०७४ सालमै साइपाल गाउँपालिकामा बैंकिङ सेवा पुर्याउने जिम्मा एभरेष्ट बैंकलाई तोकेको थियो । तर सडक, सञ्चार, सुरक्षालगायतका पूर्वाधार स्थानीयस्तरसम्म उपलब्ध नभएसम्म त्यहाँ शाखा स्थापना गर्न नसक्ने भन्दै एभरेष्ट बैंकले शाखा स्थापना गर्न आनकानी गर्दै आइको छ ।
नेपाल राष्ट्र बैंकको फागुन मसान्तसम्मको तथ्यांक अनुसार वाणिज्य बैंक, विकास बैंक, फाइनान्स कम्पनी र लघुवित्त कम्पनीहरुले ११ हजार ५९४ शाखा विस्तार गरेका छन् । जसमध्ये वाणिज्य बैंकका ५ हजार ४१ शाखा र लघुवित्तका ५ हजार १३० शाखा विस्तार भएका छन् । विकास बैंकका १ हजार १३५ र फाइनान्स कम्पनीका २८८ वटा शाखा विस्तार भएका छन् ।
