विराटचोकः नेपाल राष्ट्र बैंकले वाणिज्य बैंकको सङ्ख्या घटाउन चाहिरहेको बेला मुक्तिनाथ विकास बैंक लिमिटेडले भने विकास बैंकबाट वाणिज्य बैंक बन्न दुई वित्तीय संस्थालाई प्राप्ति (एक्विजिशन) गर्ने प्रक्रिया अघि बढाएको छ ।
सो बैंकले जानकी फाइनान्स कम्पनी लिमिटेड र सिन्धु विकास बैंक लिमिटेडलाई प्राप्ति गर्ने गरी प्रारम्भिक सम्झौता पत्रमा हस्ताक्षर गरेको जनाएको छ । बैंकको सञ्चालक समितिको भदौ १९ गते बिहान ११ बजे बसेको ३८५ औँ बैठकले सो निर्णय गरी सम्झौतामा हस्ताक्षर भएको जनाइएको छ ।
सम्झौतामा तीनवटै संस्थाका तर्फबाट सम्बन्धित प्रतिनिधिहरूले हस्ताक्षर गरेका छन् । वित्तीय क्षेत्रको सुदृढीकरण, संस्थागत क्षमता अभिवृद्धि, व्यवसाय विस्तार तथा ग्राहकलाई थप प्रभावकारी वित्तीय सेवा उपलब्ध गराउने उद्देश्यले प्रस्तावित प्राप्ति प्रक्रिया अघि बढाइएको जनाइएको छ ।
प्रारम्भिक सम्झौताअनुसार प्रस्तावित प्राप्तिसम्बन्धी आवश्यक विस्तृत अध्ययन तथा मूल्याङ्कन गरिने भएको छ । सम्पत्ति तथा दायित्वको यथार्थ परीक्षण, शेयर आदान–प्रदानसम्बन्धी व्यवस्था तथा अन्य आवश्यक प्रक्रिया अघि बढाइने जनाइएको छ ।
प्रस्तावित प्राप्ति प्रक्रिया नेपाल राष्ट्र बैंक तथा प्रचलित कानुनबमोजिम आवश्यक स्वीकृति र नियामकीय प्रक्रिया पूरा भएपछि अन्तिम चरणमा पुग्नेछ ।
सम्बन्धित समाचार
