विराटनगरः झापा र मोरङ जिल्लाका छुट्टाछुट्टै स्थानबाट विभिन्न मुद्दाका ८ जना फरार प्रतिवादीहरुलाई प्रहरीले पक्राउ गरेको छ । फरार प्रक्राउ अभियान अन्तर्गत उनीहरु पक्राउ परेका हुन् ।
अभियानअन्तर्गत जिल्ला प्रहरी कार्यालय झापा तथा मातहत प्रहरी कार्यालयहरुबाट खटिएको प्रहरी टोलीले पशुपंक्षी मुद्दामा जिल्ला अदालत झापाबाट २०७८ पुस २२ गतेको फैसलाले ४ महिना ११ दिन कैद भई फरार रहेका दमक– ३ का ३६ बर्षीय खगेन्द्र दुलाललाई पक्राउ गरेको हो ।
सोही मुद्दामा २०७९ चैत ३० गतेको फैसलाले जनही ११ महिना १० दिन कैद फैसला भई फरार रहेका अर्जुनधारा– ७ का ३० बर्षीय वीरबहादुर दनुवार र अर्जुनधारा– ५ का २१ वर्षीय भोटे भन्ने इमोन तामाङलाई प्रहरीले पक्राउ गरेको हो ।
त्यसैगरी, इलाका प्रहरी कार्यालय बेलबारीबाट खटिएको प्रहरी टोलीले डाका मुद्दामा मोरङ जिल्ला अदालतबाट २०७९ बैशाख ४ गतेको फैसलाले २ महिना ६ दिन कैद र नगद ३ हजार रुपैयाँ जरिवाना फैसला भई फरार रहेका केराबारी– ६ का २१ वर्षीय रोजिस राईलाई पक्राउ गरेको हो ।
कुटपिट अंगभंग मुद्दामा २०७८ पुस २० गतेको फैसलाले नगद १० हजार रुपैयाँ जरिवाना तथा ७ दिन कैद भएका २३ वर्षीय विकास मुकारुङ राई लाई पक्राउ गरेको हो । जालसाँजी मुद्दामा २०७८ पुस १४ गतेको फैसलाले नगद ५ हजार रुपैयाँ जरिवाना भएका ५२ वर्षीय मदन अर्याललाई पनि सो टोलीले पक्राउ गरेको छ ।
यसैगरी, प्रहरी चौकी कटहरीबाट खटिएको प्रहरी टोलीले चोरी मुद्दामा नगद ६ हजार ५ सय जरिवाना र २ महिना ७ दिन कैंद तोकिएका कटहरी गाउँपालिका– १ का २८ वर्षीय करण श्रेष्ठ र सार्वजनिक मुद्धामा १ हजार ८ सय रुपैयाँ जरिवाना तोकिएका ४५ वर्षीय भुपाल यादवलाई खोजतलास गर्ने क्रममा गाउँघरबाटै पक्राउ गरेको छ ।
पक्राउ परेका उनीहरुलाई सम्बन्धित जिल्ला अदालतमा उपस्थित गराइएकोमा तोकिएको कैद भुक्तानको लागि जिल्ला कारागार पठाइएको प्रहरीले जनाएको छ ।
