कटारीः उदपुरको ताप्ली गाउँपालिका–५ मा रहेको प्रहरी चौकी रुपाटारको नवनिर्मित भवनको उद्घाटन भएको छ । कोशी प्रदेश प्रहरी प्रमुख प्रहरी नायव महानिरीक्षक चन्द्रकुवेर खापुङको प्रमुख आतिथ्यता तथा ताप्ली गाउँपालिकाका अध्यक्ष ढुङ्गराज विश्वकर्माको अध्यक्षतामा नवनिर्मित प्रहरी चौकीको उद्घाटन भएको हो ।
कार्यक्रमलाई सम्बोधन गर्नुहुँदै प्रदेश प्रहरी प्रमुख खापुङले भवन निर्माण भएपछि आम नागरिकको सुरक्षामा अहोरात्र खटिने प्रहरी कर्मचारीको मनोवल बढ्नुका साथै आम नागरिकमा प्रदान हुने प्रहरी सेवा समेत स्तरीय हुने बताउनुभयो ।
प्रमुख अतिथि खापुङले नयाँ भवन निर्माण कार्यमा सहयोग गर्नु हुने महानुभावहरुलाई प्रशंसापत्रले सम्मान गर्नुभएको थियो । सो प्रहरी चौकी शान्ति तथा पुननिर्माण मन्त्रालय, शान्तिकोषको १ करोड ११ लाख १८ हजार ४ सय ४९ रुपैयाँको लागतमा निर्माण सम्पन्न भएको हो ।
उद्घाटन कार्यक्रममा उदयपुर जिल्लाका प्रमुख जिल्ला अधिकारी हरिप्रसाद घिमिरे, जिल्ला स्थित सुरक्षा निकायका प्रमुखहरु तथा प्रहरी अधिकृतहरु, जनप्रतिनिधिहरु, विभिन्न कार्यालय, संघ संस्थाका प्रमुख, स्थानीय समाजसेवी, बुद्धिजीवी तथा स्थानीयवासीहरुको उपस्थिति रहेको थियो ।
