विराटचोकः मोरङको सुन्दरहरैँचा नगरपालिका–१०, खोर्सानेस्थित हातेमालो बहुउद्देश्यीय सहकारी संस्थाले आफ्नो २५ औँ स्थापना दिवस अर्थात् रजत जयन्ती मनाएको छ ।
विभिन्न कार्यक्रमसहित सप्ताहव्यापी रूपमा मनाइएको रजत जयन्ती शुक्रबार इन्द्रपुर जेसीजको सभाहलमा साधारणसभा तथा समापन कार्यक्रम आयोजना गरी सम्पन्न गरिएको हो । कार्यक्रममा सुन्दरहरैँचा नगरपालिकाका नगरप्रमुख केदारप्रसाद गुरागाईँ प्रमुख अतिथिका रूपमा सहभागी थिए । कार्यक्रममा संस्थाका निवर्तमान अध्यक्ष अर्जुन बस्नेतलगायतको उपस्थिति थियो ।
कार्यक्रममा अध्यक्ष हेमराज सुवेदीले सहकारीले बचत तथा ऋणको कारोबारमा मात्र सीमित नभई सदस्यलाई आर्थिक रूपमा सचेत, सक्षम, जिम्मेवार, अनुशासित र आत्मनिर्भर बनाउन काम गरिरहेको बताए । संस्थाले स्थानीय कृषकलाई उत्पादनसँग जोड्दै उत्पादन संकलन, प्रशोधन, प्याकेजिङ तथा बजारीकरणमार्फत आयआर्जनसँग जोड्ने काम गरिरहेको उनको भनाइ छ ।
सहकारीले शुद्ध तोरीको तेल, चामल, बेसारलगायत खाद्य सामग्रीसमेत बिक्री गर्दै आएको छ । संखुवासभाली बहुउद्देश्यीय सहकारी, जनभावना कृषि सहकारी र किस्ती जलाधार कृषि सहकारीसँग एकीकरण गरेपछि संस्थाको कारोबार थप फराकिलो भएको अध्यक्ष सुवेदीले बताए ।
रजत जयन्तीका अवसरमा संस्थाले ७७ जना पूर्वपदाधिकारी तथा पूर्वसञ्चालकलाई ‘अग्रज सम्मान’ प्रदान गरेको छ ।
सहकारीले ‘हातेमालो स्मारिका–२०८३’ समेत प्रकाशन गरेको छ । १२९ पृष्ठको स्मारिकामा सहकारी क्षेत्रसँग सम्बन्धित व्यक्तिका लेख, रचना तथा विचारका साथै संस्थाको परिचय र प्रतिवेदन समेटिएको छ । स्मारिका सम्पादन संयोजक गुरुप्रसाद अधिकारी तथा सदस्य बलराम पोखरेल र व्यवस्थापक योजना शर्माको संयोजनमा तयार भएको हो ।
संस्थाले आर्थिक वर्ष २०८३÷०८४ का लागि शेयर पूँजी, बचत तथा ऋण वृद्धि गर्ने लक्ष्यसहित नीति तथा कार्यक्रम पारित गरेको छ । ऋण असुलीलाई प्रभावकारी बनाउने, लघु उद्योग सञ्चालन तथा नयाँ भवन निर्माण गर्ने र नयाँ भवनमा अत्याधुनिक मिल सञ्चालन गर्ने योजना पनि अघि सारेको छ ।
यस्तै युवालाई सहकारीमा जोड्ने, सहकारी शिक्षा तथा तालिम सञ्चालन गर्ने र सामाजिक उत्तरदायित्वका कार्यक्रमलाई निरन्तरता दिने योजना संस्थाले लिएको छ ।
रजत जयन्ती कार्यक्रममा उत्कृष्ट बचतकर्ता, उत्कृष्ट ऋणी, उत्कृष्ट विद्यार्थी, उत्कृष्ट कर्मचारी तथा उत्कृष्ट कार्यसम्पादन गर्ने सञ्चालकलाई पुरस्कार तथा सम्मान प्रदान गरिएको थियो । व्यवस्थापक योजना शर्मालाई दीर्घसेवा पदक प्रदान गरिएको थियो ।
सञ्चालक समितितर्फ उपाध्यक्ष मीनप्रसाद लिम्बू र यज्ञप्रसाद ढकाल तथा कर्मचारीतर्फ वरिष्ठ सहायक कमला दाहाल बराल, सहायक तेजप्रसाद आचार्य र कनिष्ठ सहायक हिमादेवी अधिकारी सम्मानित भएका छन् ।
त्यस्तै व्यावसायिक ऋणीतर्फ तेजकुमार श्रेष्ठ, टेकबहादुर खत्री र पदमबहादुर थापा, घरायसी ऋणीतर्फ मित्रजङ्ग थापा तथा कृषि ऋणीतर्फ राजेन्द्र शर्मा, टोसबहादुर श्रेष्ठ र प्रमिलाकुमारी महतो सम्मानित भएका छन् ।
नियमित बचतकर्तातर्फ इन्द्रमाया कार्की, रत्नमाया श्रेष्ठ र देवी राई तथा खुत्रुके बाल बचततर्फ श्रिया कार्की, सुगम तामाङ र नवनजंग कार्कीलाई सम्मान गरिएको छ ।
यसैगरी २०८२ सालको एसईई परीक्षामा उत्तीर्ण हुने शेयर सदस्यका छोराछोरीतर्फ रोयल देवकोटा, ओमप्रकाश पराजुली, स्वस्तिका शर्मा, शिशिर ढकाल, साहिल ढकाल र आदित्यराज बराललाई सम्मान गरिएको संस्थाले जनाएको छ ।
रजत जयन्तीको अवसरमा संस्थाले साताव्यापी कार्यक्रम आयोजना गरेको थियो । जसअन्तर्गत असोज ११ गते आँखा शिविर, असोज १२ गते चेस प्रतियोगिता, असोज १३ गते अन्तरक्रिया र असोज १५ गते संस्थाको लोगो अनावरण गरिएको थियो ।
संस्थामा ५ करोड ९२ लाख ७२ हजार ७०० रुपैयाँ शेयर पूँजी रहेको छ ।
