इटहरीः पढाइ सकेर रोजगारीको खोजीमा रहेका युवा तथा आफ्नो सीपलाई आम्दानीसँग जोड्न चाहनेहरूलाई लक्षित गर्दै इटहरीमा सीप तथा रोजगार मेला आयोजना हुने भएको छ । मेला यही असोज १४ देखि २० गतेसम्म सञ्चालन हुने जनाइएको छ ।
युवा तथा रोजगार मन्त्रालयको आयोजनामा हुने मेलामा सहभागीले विभिन्न सीपमूलक तालिम, रोजगारदातासँग प्रत्यक्ष भेटघाट तथा रोजगारीका नयाँ अवसरबारे जानकारी लिन सक्ने आयोजकले जनाएको छ । मेलामा ६५ वटा स्टल रहनेछन्, जहाँ विभिन्न क्षेत्रका सीप र ज्ञानसम्बन्धी अवसर उपलब्ध हुनेछन् ।
मेलामा डिजिटल तथा व्यवसायिक क्षेत्रअन्तर्गत उद्यमशीलता विकास, आधारभूत लेखा, एआई तथा डिजिटल मार्केटिङ सम्बन्धी जानकारी र सीप सिक्ने अवसर हुनेछ । त्यस्तै, हस्पिटालिटी तथा सेवा क्षेत्रमा ग्राहक सेवा, बारिष्टा, कुक, वेटर तथा सञ्चार कला सम्बन्धी सीप सिकाइनेछ ।
प्राविधिक तथा घरेलु सीपतर्फ सिटी सफारी तथा विद्युतीय सवारी मर्मत, एसी मर्मत, मेकअप तथा नेल आर्ट र अचार बनाउने लगायतका तालिम तथा जानकारी उपलब्ध गराइनेछ । मेलामा सहभागीलाई बायोडाटा बनाउन सहयोग तथा प्रेरणादायी वक्ताबाट उत्प्रेरणात्मक प्रस्तुति सुन्ने अवसरसमेत रहने भएको छ ।
आयोजकका अनुसार मेलाको उद्देश्य युवाको सीपलाई रोजगारी र उद्यमशीलतासँग जोड्दै स्थानीयस्तरमै अवसरको खोजी गर्ने वातावरण सिर्जना गर्नु हो ।
‘सीप तपाईंको, अवसर हाम्रो र विकास हामी सबैको’ भन्ने अवधारणासहित आयोजना हुने मेलाको मूल सन्देश ‘सीप र रोजगारीः साझा जिम्मेवारी’ रहेको छ । मेलामा सहभागी भई आफ्नो भविष्यलाई नयाँ दिशा दिन आयोजकले युवालगायत इच्छुक सबैलाई आयोजकले आह्वान गरेको छ ।
