इटहरीः सुनसरीको इटहरीमा रहेको उत्सव होटलमा हिजो साँझ अलि फरक माहोल थियो । ८ दिन अघि दिवङ्गत हुनुभएका नेपाल भाषाका जनकवि दुर्गालाल श्रेष्ठको स्मृतिमा श्रेष्ठले नै रचना गरेका कविता वाचन तथा गीत गायनको कार्यक्रम राखिएको थियो ।
‘नझरेका फूलहरू’को आयोजनामा भएको कार्यक्रममा ४ जना गायकले श्रेष्ठद्वारा रचित नेपाली तथा नेपाल भाषाका गीत गाउनुभएको थियो । १४ जना सर्जकले कवि श्रेष्ठका कविता वाचन गर्नुभएको थियो ।
कार्यक्रममा गायक कृष्णाराजा श्रेष्ठले ‘नजिक आउनुमा…..’, बोलको गीत, गायक दुर्गा पराजुलीले ‘सयथरी बाजा एउटै ताल….’, बालगायक योग्यता घिमिरेले ‘फूलको आँखामा फूलै संसार…..’, र गीताप्रसाद श्रेष्ठले नेपाल भाषाको चर्चित गीत ‘राजमती कुमति……’ गाउनुभएको थियो ।
स्वर्गीय श्रेष्ठका रचनाहरू विभिन्न स्रष्टाले वाचन गर्नुभएको थियो । जसअन्तर्गत सर्जक मनु मञ्जिलले स्मृतिपत्र, हेमन यात्रीले दुई थोपा र चन्द्र गुरुङले सफल प्रहसन शीर्षकको कविता वाचन गर्नुभएको थियो ।
देवान किराती र विवेक विवश रेग्मीले दुईदुई ओटा कविता वाचन गर्नुभएको थियो । किरातीले घरमुली र देख्दैछु शीर्षकका तथा रेग्मीले नक्कली मान्छे र प्रेम शीर्षकका कविता वाचन गर्नुभएको थियो ।
भानु साझा पुस्तकालयका अध्यक्ष पुरन याक्खाले संजोग, बेलबारी साहित्य विकास समितिका जे.बी. थुलुङले नेपाली आवाज, सर्जक तथा राजनीतिज्ञ मीना श्रेष्ठले फूल, कविता र म, किरण टी. लिम्बूले अन्तर्भाव र सञ्चारकर्मी खेमचन्द्र अधिकारीले प्रार्थना शीर्षकका कविता वाचन गर्नुभएको थियो ।
सर्जक शकुन्तला मञ्जरील बलिदानी वेग, पुष्पा शायराले यो घडी, नवीन क्षत्रीले नयाँ वर्ष र विनेश राई मिन्जाईले के गरुँ शीर्षकका रचना वाचन गर्नुभएको थियो ।
कार्यक्रमको सञ्चालन जेनिशा सुमन जुनईराले गर्नुभएको थियो ।
