धरानः एलाइनेट जिमको आयोजनामा चैत २३ र २४ गते पाँचौँ मिस्टर कोशी बडिबिल्डिङ च्याम्पियनसिप हुने भएको छ ।
एलाइनेट जिमको २१ औ प्रस्तुतिको रुपमा पाँचौँ मिस्टर कोशी आयोजना हुन लागेको हो । प्रतियोगितामा ५५ केजी, ६० केजी, ६५ केजी, ७० केजी र ७५ केजी गरी पाँच तौल समूहमा करीब ५० खेलाडीले प्रतिष्पर्धा गर्ने आयोजकले जनाएको छ ।
प्रत्येक तौल समूहका विजेताले उपाधिका लागि फाइनल चरणमा प्रतिस्पर्धा गरेपछि पाँचौँ मिस्टर कोशीको उपाधि विजेता घोषित गरिने आयोजकले जनाएको छ ।
एलाइनेट जिमका अध्यक्ष विक्रम लिम्बूका अनुसार प्रतियोगिताका विजेताले नगद एक लाख १० हजार, ट्रफी, मेडल र प्रमाणपत्र तथा दोस्रोले नगद ५० हजार, तेस्रोले नगद ३५ हजार, चौथोले नगद २५ हजार र पाँचौँले नगद २० हजार रुपैयाँ, ट्रफी, मेडल र प्रमाणपत्र पाउनेछन् ।
हरेक विधातर्फका बेस्ट पोजर, मोस्ट इम्प्रुभमेन्ट र मस्कुलर म्यान उपाधि विजेतालाई नगद ५ हजार ट्रफी र प्रमाणपत्र दिइने भएको छ ।
