विराटनगरः कोशी प्रदेश सरकारमा नेपाली कांग्रेसबाट सहभागी मन्त्रीहरूले मुख्यमन्त्री हिक्मतकुमार कार्कीसमक्ष सामुहिक राजीनामा दिएका छन् ।
राजीनामा बुझाउनेमा भौतिक पूर्वाधार विकास मन्त्री प्रदीपकुमार सुनुवार, स्वास्थ्य मन्त्री मानबहादुर लिम्बू, पर्यटन, वन तथा वातावरण मन्त्री भीम पराजुली, उद्योग, कृषि तथा सहकारी मन्त्री इस्राइल मन्सुरी र भौतिक पूर्वाधार विकास राज्यमन्त्री शोभा चेम्जोङ पालुङ्वा रहेका छन् ।
यससँगै मुख्यमन्त्री कार्की नेतृत्वको सरकारको आगामी स्वरूप र नयाँ राजनीतिक समीकरणबारे चासो बढेको छ । राजीनामापछि मुख्यमन्त्री कार्कीले सरकार पुनर्गठन तथा आगामी राजनीतिक सहकार्यबारे आवश्यक निर्णय लिने तयारी गरेका छन् ।
नेपाली कांग्रेस र नेकपा (एमाले) नेतृत्वको कोशी प्रदेश सरकारमा सहभागी कांग्रेसका मन्त्रीहरूले बुधबार मुख्यमन्त्री कार्कीलाई भेटेर सामूहिक रूपमा राजीनामा बुझाएका हुन् ।
