विराटचोकः कोशी प्रदेशले लिएको शिक्षक सेवा आयोगको परीक्षा उत्तीर्ण गरी निम्नमाध्यमिक तहको शिक्षकमा नाम निकालेपछि पाँचथरको फाल्गुनन्द गाउँपालिका– १ की २० वर्षीया लेकीडोमा तामाङ र संखुवासभाको सिलिचोङ गाउँपालिकाका रविन राई यतिखेर चर्चामा छन् ।
तामाङले कोशी प्रदेशबाट गणित विषयमा र राईले विज्ञान विषयमा नाम निकालेका हुन् । १४ वर्षमा एसईई दिएकी उनी २० वर्षमा शिक्षक बनेकी हुन् ।
गाउँकै सिद्धकालिका माविमा १ देखि १० सम्म पढेकी तामाङले ११ र १२ कक्षा पाँचथरको सदरमुकाम फिदिममा रहेको कञ्चनजंघा माध्यमिक विद्यालयबाट गणित विषय लिएर पास गरिन् । उनी सुकुना बहुमुखी क्याम्पसमा अध्ययनरत छिन् ।
संखुवासभाको सिलिचोङ गाउँपालिकाको माङ्तेवाका २० वर्षीय रविन राईले निम्नमाध्यमिक तहको विज्ञान विषयमा नाम निकालेका हुन् । कान्छा शिक्षक भनेर उनीहरुलाई बधाई आइरहेको छ । लेकीडोमाको भन्दा केही महिनाले मात्र रविनको उमेर बढी छ ।
रविनले संखुवासभाको खाँदबारीस्थित बागेश्वरी माध्यमिक विद्यालयबाट १२ कक्षा उत्तीर्ण गरेका हुन् । उनले २०७८ मा १२ पास गरे । त्यसपछि उनी बीएडमा विज्ञान विषय पढ्न सुकुना बहुमुखी क्याम्पस मोरङ आए । २०७९ मा शिक्षक लाइसेन्स खुलेपछि त्यसमा पास हुँदै उनीहरु दुवै जनाले २०८० मा शिक्षक पदको लागि खुलेको विज्ञापनको लागि परीक्षा दिएका थिए ।
