इटहरीः समस्याग्रस्त अम्बे बचत तथा ऋण सहकारी संस्थाको भवन न्यून मूल्यमा लिलाम बिक्री हुन लागेपछि लिलामी प्रक्रिया रोक्न सांसल लालविक्रम थापाले माग गरेका छन् ।
अढाई करोडमा लिलामी गर्न लागिएको सो भवनमा ४ करोड रुपैयाँ खर्च भएको सांसद लालविक्रम थापा बताउनुहुन्छ ।
सामाजिक सञ्जालमा उहाँ लेख्नुहुन्छ, ‘सम्पत्तिमाथिको संवैधानिक हक, सहकारी ऐन, नियमावली तथा मुलुकी देवानी संहिताले प्रदत्त गरेको अङ्सियार शेयरधनीहरू समेत बचतकर्ताको हक अधिकार नजर अन्दाज गर्न कसैलाई छुट छैन ।
झन्डै १५ वर्षअघि इटहरीका नागरिकको करिब ३ करोड लगानीमा घर जग्गा खरिद पश्चात करिब १ करोड थप लगानी गरी तला थप र मर्मतसमेत गरिएको अम्बे सहकारी संस्थाको यो भवन आज साढे २ करोड हाराहारीमा लिलामी गर्ने तयारी हुनु अत्यन्तै गम्भीर विषय हो ।
यो भवन कुनै व्यक्तिको निजी सम्पत्ति होइन, हजारौँ नागरिकको पसिनाबाट बनेको सम्पत्ति हो । त्यसैले अङ्सियार शेयरधनी र बचतकर्ताको रकम सुरक्षित फिर्ता हुने सुनिश्चित नभएसम्म लिलामी प्रक्रिया तत्काल रोक्न सम्बन्धित निकायको ध्यानाकर्षण गराउँछु ।
