विराटचोकः देशभरिका ११ उपमहानगरपालिकामध्ये कार्यसम्पादन मूल्याङ्कनमा बुटवल उपमहागरपालिका सबैभन्दा अगाडि देखिएको छ ।
राष्ट्रिय प्राकृतिक स्रोत तथा वित्त आयोगले बिहीबार कार्यसम्पादन मूल्याङ्कन नतिजा सार्वजनिक गर्दा ६४.४४ अंकसहित बुटवल अगाडि आउँदा सबैभन्दा कमजोर इटहरी उपमहानगरपालिका रहेको छ । इटहरीले ३८.९६ अङ्कमात्र पाएको छ ।
तुलसीपुरले ६१.५३ र घोराहीले ६१.०८ अङ्क पाउँदा धरान उपमहानगरले ४९.७६ अङ्क पाएको छ ।
आयोगले स्थानीय तहका हकमा कुल १७ सूचकमा मूल्याङ्कन गरेको थियो । जसमा १० असारभित्र बजेट सार्वजनिक गरे\नगरेको, असार मसान्तभित्र बजेट पास गरे\नगरेको उल्लेख छ ।
यसैगरी आव २०८१\८२ मा घरजग्गा रजिस्ट्रेसन शुल्क, मनोरञ्जन कर तथा विज्ञापन करबापत उठेको रकमध्ये प्रदेश सरकारलाई दिनुपर्ने ४० प्रतिशत रकम मासिक प्रदेश सञ्चित कोषमा दाखिला गरे\नगरेको समेत मूल्याङ्कनको सूचक मानिएको छ ।
आगामी आवको बजेट प्रक्षेपण सहित विवरण अर्थ मन्त्रालयमा बुझाए\नबुझाएको, बजेट समीक्षा गरी कात्तिक मसान्तभित्र सार्वजनिक गरे\नगरेकोलाई समेत सूचक मानिएको छ ।
राजस्व परिचालन, बजेट खर्चको अवस्था, बेरुजु, सूत्र सफ्टवेयर प्रयोग, विद्यार्थी भर्ना दर, कक्षा ९ मा विद्यार्थी टिकाउ दर, गर्भ जाँच गर्ने महिला अनुपात, एसईई परीक्षा नतिजा, खोप लगाएका बालबालिका अनुपात समेत आयोगले मूल्याङ्कनका आधार मान्ने गरेको छ ।
देशभरि ८० अङ्क कटाउने स्थानीय तह ४ वटामात्र छन् । पाणिनी गाउँपालिका सबैभन्दा उत्कृष्ट ठहरिएको छ ।
यस्तो छ उपमहानगरपालिकाको अङ्कतालिका
बुटवलः ६४.४४
तुलसीपुरः ६१.५३
घोराहीः ६१.०८
धनगढीः ५६.६०
नेपालगञ्जः ५६.४५
हेटौंडाः ५४.१३
जनकपुरः ५१.५८
धरानः ४९.७६
कलैयाः ४९.५७
जीतपुर सिमराः ४८.३९
इटहरीः ३८.९६
