विराटचोकः देशभरका ७ सय ५३ स्थानीय सरकारमध्ये कार्यसम्पादन मूल्याङ्कनमा अर्घाखाँचीको पाणिनी गाउँपालिका सर्वाेत्कृष्ट भएको छ । सो गाउँपालिकाले कुल ८३ दशमलव ८४ अङ्क प्राप्त गरी पहिलो स्थानमा रहेको राष्ट्रिय प्राकृतिक स्रोत तथा वित्त आयोगले बिहीबार सार्वजनिक गरेको नतिजामा उल्लेख छ । नतिजाअनुसार ८० अङ्क कटाउने जम्मा ४ वटा पालिका छन् ।
रुकुमश्चिमको चौरजहारी नगरपालिकाले ८२ दशमलव १५ अङ्क ल्याएर दोस्रो स्थानमा छ । गुल्मीको मालिका गाउँपालिकाले ८१ दशमलव ९८ प्रतिशत र धुर्कोट गाउँपालिकाले ८० दशमलव ५२ प्रतिशत अङ्क ल्याएर उत्कृष्ट गाउँपालिकाको सूचीमा अगाडि छन् ।
आयोगले स्थानीय तहका १७ सूचकमा मूल्याङ्कन गरेको थियो । जसमा १० असारभित्र बजेट सार्वजनिक गरेको वा नगरेको, असार मसान्तभित्र बजेट पास गरेको वा नगरेको उल्लेख छ । यसैगरी आर्थिक वर्ष २०८१÷८२ मा घरजग्गा रजिस्ट्रेसन शुल्क, मनोरञ्जन कर तथा विज्ञापन करबापत उठेको रकमध्ये प्रदेश सरकारलाई दिनुपर्ने ४० प्रतिशत रकम मासिक प्रदेश सञ्चित कोषमा दाखिला गरेको नगरेको समेत मूल्याङ्कनको सूचक मानिएको छ ।
आगामी आर्थिक वर्षको बजेट प्रक्षेपण सहित विवरण अर्थ मन्त्रालयमा बुझाएको वा नबुझाएको, बजेट समीक्षा गरी कात्तिक मसान्तभित्र सार्वजनिक गरेको वा नगरेकोलाई समेत सूचक मानिएको छ । राजस्व परिचालन, बजेट खर्चको अवस्था, बेरुजु, सूत्र सफ्टवेयर प्रयोग, विद्यार्थी भर्ना दर, कक्षा ९ मा विद्यार्थी टिकाउ दर, गर्भ जाँच गर्ने महिला अनुपात, एसईई परीक्षाको नतिजा, खोप लगाएका बालबालिकाको अनुपात समेत आयोगले मूल्याङ्कनका आधार मान्ने गरेको छ ।
आयोगका अनुसार कार्यसम्पादन मूल्याङ्कनमा मधेस प्रदेशका अधिकांश स्थानीय तहको अङ्क कमजोर छ । धनुषाको धनौजी गाउँपालिले ३१.८१ अङ्क पाएको छ । महोत्तरीको सोनमा गाउँपालिकाले ३५ अङ्क पाएको छ । सर्लाहीको चन्द्रनगर गाउँपालिकाले ३५.१६ अङ्क पाएको छ ।
