विराटचोकः भनिन्छ १२ वर्षमा खोलो फर्कन्छ । नेपाली कांग्रेस धनकुटालाई यो उखान लागू भएको छ । १२ वर्षसम्म कांग्रेसले धनकुटाबाट संसदमा प्रतिनिधित्व पठाउन सकेको थिएन । तर १२ वर्षपछि कांग्रेसका सुनिलबहादुर थापा निर्विरोध निर्वाचित हुँदै राष्ट्रिय सभामा प्रवेश गरेका छन् ।
माघ ११ गते राष्ट्रिय सभाको निर्वाचन हुँदैछ । कांग्रेस र एमालेको बलियो समीकरणको जगमा थापा कोशी प्रदेशबाट राष्ट्रिय सभा सदस्यमा निर्विरोध निर्वाचित भएपछि धनकुटा कांग्रेसको १२ वर्ष लामो संसदीय रिक्तता विधिवत् रूपमा अन्त्य भएको छ । कोशी प्रदेशको अन्य समूहबाट उम्मेद्वारी दिएका थापाविरुद्ध अरु कसैको पनि उम्मेदवारी परेन । नेकपाका उम्मेद्वार हेमराज घिमिरे उम्मेदवारी दर्ता गर्न निर्धारित समयमा निर्वाचन अधिकृतको कार्यालयमा पुग्न नसक्दा त्यसको फाइदा थापालाई पुगेर निर्विरोध निर्वाचित भएका हुन् ।
धनकुटाबाट २०६४ सालमा लीला सुब्बा र २०७० सालमा मनोहरनारायण श्रेष्ठ तथा अन्जना ताम्ली समानुपातिकबाट संविधानसभा सदस्य भएयता धनकुटाबाट कांग्रेसले संघीय सदनमा उपस्थिति देखाउन सकेको थिएन । प्रत्यक्ष निर्वाचनमा भने हालसम्म कहिल्यै कांग्रेसले जितेको छैन ।
कांग्रेसभित्र पछिल्लो समय महामन्त्री गगन थापा पक्षमा ढल्किएका सुनिललाई राष्ट्रिय सभामा पठाएर संस्थापन पक्षले जिल्ला र केन्द्रको शक्ति सन्तुलन मिलाउने रणनीति लिँदा राप्रपा छोडेर कांग्रेस प्रवेश गरेका सुनिलले टिकट पाएका थिए । सुनिल पूर्व प्रधानमन्त्री तथा राष्ट्रिय प्रजातन्त्र पार्टीका पूर्व अध्यक्ष सूर्यबहादुर थापाका छोरा हुन् ।
थापा निर्विरोध भए पनि कोशी प्रदेशमा बाँकी दुई पदका लागि भने प्रतिस्पर्धा हुने भएको छ । एमाले –कांग्रेस गठबन्धनबाट दलित कोटामा सोम पोर्तेल र महिलामा रोशनी मेचे चुनावी मैदानमा छन् । उनीहरूलाई नेकपाका खेम सुन्दास र नमिता न्यौपानेले चुनौती दिँदैछन् ।
