काठमाडौंः सिद्धार्थ बैंक नेपाल प्रिमियर लिग (एनपीएल) को फाइनलमा सुदूरपश्चिम लगातार दोस्रो पटक प्रवेश गरेको छ । आज भएको क्वालिफायरमा विराटनगर किंग्सलाई ७८ रनले हराएको हो ।
सुदूर पश्चिमले दिएको १५६ रनको लक्ष्य पछ्याएको विराटनगरले १४.१ ओभरमा सबै विकेट गुमाएर ७८ रनमा अलआउट भयो । विराटनगरका लागि ओपनर फाफ डु प्लेसीले सर्वाधिक ३६ रन बाहेक अन्यले सम्झनलायक ब्याटिङ गर्न सकेनन् । उनले २९ बल खेल्दै ३ चौका र १ छक्का प्रहार गरे ।
मर्चेन्ट डे लाङले १५ र बसिर अहमदले १२ रन जोडे । बाँकी खेलाडीले दोहोरो अङ्कमा रन जोड्न सकेनन् ।
सुदूर पश्चिमका बलरले पहिलो ओभरदेखि नै विकेट लिन थालेपछि विराटनगरको इनिङ्स धर्मराएको थियो । विराटनगरलाई अलआउट गर्न सुदूर पश्चिमका बलरहरुले उत्कृष्ट बलिङ र फिल्डिङ गरेका थिए ।
सुदूरपश्चिमका स्कट कुगेलेइन, हर्मीत सिंह र अविनाश बोहराले २–२ विकेट लिए । हेमन्त धामी र कप्तान दीपेन्द्र सिंह ऐरीले समान १ विकेट लिए । विराटनगरका दुई खेलाडी रनआउट भए ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको साविक उपविजेता सुदूर पश्चिमले निर्धारित २० ओभरमा ७ विकेट गुमाएर १५५ रन बनाएको थियो ।
