काठमाडौंः कीर्तिपुरमा भइरहेको दोस्रो संस्करणको नेपाल प्रिमियर लिग (एनपिएल) मा आज पहिलो क्वालिफायर खेल हुनेछ । आज अपराह्न ४ बजे हुने उक्त खेलमा सुदूर पश्चिम रोयल्स र विराटनगर किङ्स प्रतिस्पर्धा हुँदैछ । सुदूर पश्चिम अघिल्लो सिजनको उपविजेता टिम हो ।
सुदूर पश्चिम अङ्क तालिकाको शीर्ष र विराटनगर दोस्रो स्थानमा पुगेर पहिलो क्वालिफायर खेल्ने पक्का गरेका हुन् । सुदूर पश्चिमले लिग चरणका सात खेलमध्ये छ र विराटनगरले सातमध्ये पाँच खेल जितेको थियो । सुदूर पश्चिमले विराटनगरसँग मात्रै लिग चरणमा पराजित भएको थियो । विराटनगरले चितवन र लुम्बिनीसँग हार बेहोरेको थियो ।
आज जित्ने टोली सिधैं फाइनल पुग्नेछ । पराजित टोलीले इलिमिनेटर खेल्ने मौका पाउने हुनाले उसको पनि फाइनल पुग्ने सम्भावना रहिरहन्छ ।
