विराटचोकः अन्तरराष्ट्रिय सञ्चार माध्यमका अनुसार बेलायतमा बलात्कार तथा यौन दुराचारको अभियोगमा बेलायतको पिटरबरो बस्दै आएका ४९ वर्षीय प्रमोद ढकाललाई २५ वर्ष जेल सजाय भएको छ ।
पुर्ख्यौली घर धादिङ भएका उनलाई क्याम्ब्रिज क्राउन कोर्टले २५ वर्षको जेल सजायका साथै त्यसपछिका ८ वर्षसम्म समेत लाइसेन्स अर्थात् कडा निगरानीमा राख्ने फैसला सुनाएको छ । विगत १७ वर्षको अवधिमा भएका यौन दुराचारसम्बन्धी विभिन्न २५ वटा अपराधमा अदालतले ढकाललाई दोषी ठहर गरेको छ ।
उनले १३ वर्ष मुनिका बालिकामाथि ५ पटक र १३ वर्षमाथिका बालिकामाथि २ पटक बलात्कार गरेको जनाइएको छ । उनले ८ वर्ष उमेरकी नाबालिकालाई समेत बलात्कार गरेको ठहर अदालतले गरेको छ । अधिकांश पीडित पिटरबरो क्षेत्रकै नेपाली मूलका र एक जना लण्डनको भएको बताइएको छ ।
समुदायको विश्वासिलो सदस्य र एक धार्मिक व्यक्तिको रुपमा बनाएको सहज पहुँचलाई दुरुपयोग गर्दै उनले यौन दुराचार गरेको ठहर अदालतले गरेको छ । पीडितमध्ये धेरै जना पारिवारिक सम्बन्ध रहेका परिवारका सदस्य छन् । उनले एकै परिवारका एक भन्दा बढी सदस्यमाथि पनि यौन दुराचार गरेको पत्ता लागेको छ ।
सन् २००६ देखि पिटरबरोमा बस्दै आएका ढकाल सन् १९९८ देखि लन्डनमा बस्ने गर्थे । पिटरबरोमा रेष्टुरेन्ट व्यवसायमा समेत संलग्न रहंदै आएका उनलाई नेपालीले पण्डितका रुपमा समेत पुज्ने गरेका थिए ।
उनले पाएको सजायबारे बीबीसी लगायतका मिडियाहरूले समाचार लेखेका छन् ।
