विराटचोकः कोशी साहित्य–कला परिषद् नेपालको संयोजनमा गजलकार तथा गायक राज यात्री लम्सालको स्वागतार्थ साहित्यिक रचना वाचन तथा भेटघाट कार्यक्रम भएको छ ।
‘मेरो यात्रा’ गीत\गजल एल्बम प्रकाशनमा ल्याएका लम्सालले २०६४ सालमा ‘विम्ब’ भाग –२ (संयुक्त एल्बम) प्रकाशनमा ल्याएका थिए । विभिन्न पत्रपत्रिकामा उनका फुटकर रचनाहरू प्रकाशन हुँदै आएका छन् । सगरमाथा साहित्य प्रतिष्ठानका केन्द्रीय सदस्य तथा कोशी प्रदेश इन्चार्ज र साहित्यपोस्ट अनलाइनका युएई संयोजकसमेत रहेका उनी ग्लोरी भ्वाइस आइकन अनलाइन गायन प्रतियोगितामा २०७४ मा तेस्रो भएका थिए ।
माउण्ट मिडिया विश्व सेवा, बोधी एचडी तथा नेपाल म्युजिक फाउन्डेसनको संयुक्त आयोजनामा २०७५ सालमा सम्पन्न विश्वव्यापी गजल प्रतियोगितामा तृतीय र पाँचथर गजल मञ्चले २०७५ सालमा आयोजना राष्ट्रिय गजल प्रतियोगितामा प्रथम भएका उनी सुन्दरहरैँचा –८, सलकपुर, मोरङ स्थायी बसोबास गर्ने लम्सालले साहित्यिक भेटको अवसरमा एक दर्जनजति गीत तथा गजल गाएका थिए । उनलाई कलाकारहरू पुण्यप्रसाद सङ्ग्रौला, भूमा अधिकारी, शर्मिला सिग्देल, लीला सङ्ग्रौला, आइतराज लिम्बूले साथ दिएका थिए ।
कार्यक्रममा पुरन याक्खा, रमेश निरौला, सिजन श्रेष्ठ, प्रिन्स प्रमोदकुमार ढकाल, नवराज पोखरेल, ‘नवशिला’, चिरञ्जीवी काफ्ले, प्रकाश भट्टराई, गीताप्रसाद श्रेष्ठ, रूपनारायण श्रेष्ठलगायतका स्रष्टाहरूले रचनावाचन गरेका थिए ।
यस्तै प्रकारको कार्यक्रम यसअघि रङ्गेलीमा र बेलबारीमा सम्पन्न भइसकेको परिषद्का अध्यक्ष केशु विरहीले जानकारी दिए ।
