धनकुटाः विराटनगरबाट धनकुटाको महालक्ष्मी नगरपालिकाको जीतपुर जाँदै गरेको बस आज दिउँसो पौने १२ बजे धनकुटाको निगालेमा दुर्घटना हुँदा दुई जनाको मृत्यु भएको छ । प्रदेश १–०२–००१ख ९६०६ नम्बरको बस दुर्घटना हुँदा चालकसहित ७ जना घाइते भएका छन् ।
प्रहरीका अनुसार मृत्यु हुनेमा धनकुटा जिल्लाको महालक्ष्मी नगरपालिका–६ का अन्दाजी ५५ वर्षीय गंगा कार्की र महालक्ष्मी ७ का ६० वर्षीय डिल्ली बरालको उपचारको क्रममा जिल्ला अस्पताल धनकुटामा मृत्यु भएको हो ।
सो बसमा सवार मोरङको सुन्दरहरैंचा नगरपालिका वडा नम्बर ७ गछियाका दिलकुमार खड्काकी ८ वर्षीया छोरी अंकिता खड्का, केराबारी गाउँपालिका वडा नम्बर ९ बस्ने ६० वर्षीया देवी न्यौपाने, धनकुटाको महालक्ष्मी–९ बस्ने ७५ वर्षीया तारादेवी काफ्ले, महालक्ष्मी–७ बस्ने ३२ वर्षीया सृजना जिमी, महालक्ष्मी–८ बस्ने १७ वर्षीया खुशी लुंगेली, धनकुटा नगरपालिका ४ लोकसेवा बस्ने अन्दाजी ४५ बर्षिया दुर्गा तिम्सिना र बस चालक सुनसरीको इटहरी उप–महानगरपालिका १७ बालग्राम बस्ने ५० वर्षीय कुलबहादुर मगर रहेका छन् ।
बस चालक मगरको हिले पोलिक्लिनिकमा उपचारपछि प्रहरी चौकी हिलेले नियन्त्रणमा लिएको छ ।
दुर्घटनाको खबर पाउनासाथ नेपाल प्रहरी, सशस्त्र प्रहरी र नेपाली सेनाको टोली घटनास्थल पुगी घाइतेहरुको उद्धार गरी जिल्ला अस्पताल धनकुटामा उपचारका लागि पठाएको थियो ।
