विराटचोकः मोरङको सुन्दरहरैंचा–१० मा रहेको हातेमालो बहुउद्देश्यीय सहकारी संस्था लिमिटेडको २३ औं वार्षिक साधारणसभा तथा रक्तदान कार्यक्रम सम्पन्न भएको छ ।
इन्द्रपुर जेसीजको सभाहलमा भएको साधारणसभामा सुन्दरहरैंचा नगरपालिका नगर प्रमुख केदारप्रसाद गुरागाई प्रमुख अतिथि रहनुभएको थियो । साधारणसभाको प्रारम्भमा सहकारीले सामाजिक उत्तरदायित्वअन्तर्गत रक्तदान कार्यक्रम आयोजना गरेको थियो । कार्यक्रममा २७ पिण्ट रगत सङ्कलन भएको थियो ।
सहकारी सञ्चालक समिति अध्यक्ष हेमराज सुवेदीले सञ्चालक समितिको तर्फबाट गत आर्थिक वर्ष २०८१\०८२ को वार्षिक प्रगति विवरण तथा चालु आर्थिक वर्ष २०८२\०८३ को प्रस्तावित कार्यक्रम एवम् बजेट प्रस्तुत गर्नुभएको थियो ।
लेखा सुपरिवेक्षण समितिको प्रतिवेदन लेखा समिति सदस्य देवीबहादुर कार्कीले प्रस्तुत गर्नुभएको थियो । साधारणसभामा संस्थाको वार्षिक प्रगति विवरण, नीति, कार्यक्रम र बजेटमाथि विस्तृत छलफल तथा पारित गरिएको थियो ।
७० वर्ष पूरा भएका ९ जना ज्येष्ठ शेयर सदस्यलाई सम्मान गरिएको थियो । उत्कृष्ट ऋणी, उत्कृष्ट बचतकर्ता, उत्कृष्ट बाल बचतकर्ता तथा उत्कृष्ट विद्यार्थीलाई पुरस्कार वितरण गरिएको थियो । साधारण सभाको अवसरमा चिठ्ठा विधिबाट छनोट गरी उपहार वितरण गरिएको थियो ।
कार्यक्रममा संस्थाका सल्लाहकार सदस्य तथा पूर्व अध्यक्ष अर्जुन बस्नेतले शुभकामना मन्तव्य राख्नुभएको थियो । संस्थाका उपाध्यक्ष मीनप्रसाद लिम्बूले स्वागत मन्तव्य राख्नुभएको कार्यक्रमको सञ्चालन सचिव गुरूप्रसाद अधिकारीले गर्नुभएको थियो ।
सो सहकारीले हातेमालो लघु उद्योग समेत सञ्चालन गरिरहेको छ ।
