विराटचोकः धौलागिरी लघुवित्त वित्तीय संस्था लिमिटेडको लक–इन अवधि आज भदौ १९ गते समाप्त हुने भएको छ । संस्थाका संस्थापक शेयरधनीको स्वामित्वमा रहेको तथा कर्मचारीका लागि सुरक्षित गरिएको शेयरको लक–इन अवधि समाप्त हुन लागेको हो ।
खप्तड लघुवित्तसँग मर्जरमा गएको संस्थाको मर्जरपश्चात संस्थापक शेयरधनीको स्वामित्वमा रहेको २ लाख १ हजार कित्ता र कर्मचारीको स्वामित्वमा रहेको १ हजार ५ सय कित्ता शेयरको लक–इन अवधि समाप्त हुन लागेको संस्थाले जनाएको छ ।
संस्थाले २०७९ भदौ ८ गतेदेखि १२ गतेसम्म सर्वसाधारण (कर्मचारी समेत) लाई आईपीओ निष्कासन गरेको थियो । सर्वसाधारणमा उक्त आईपीओ २०७९ भदौ २० गते बाँडफाँड गरिएको थियो ।
लक–इन पिरियड समाप्त भएपछि यी शेयर दोस्रो बजारमा कारोबारमा आउनेछन् । तर संस्थाका सञ्चालक समितिका पदाधिकारीहरु तथा व्यवस्थापन तहका कर्मचारीहरुले भने पद बहाल रहुन्जेल र अवकाश प्राप्त गरेको मितिले १ वर्षसम्म सो शेयर बिक्री गर्न पाउँदैनन् ।
