विराटचोकः शिवश्री हाइड्रोपावर कम्पनी लिमिटेडले आज भदौ १९ गतेदेखि शतप्रतिशत हकप्रद शेयर बिक्री गर्ने भएको छ ।
कम्पनीले १ अर्ब ४७ करोड ६४ लाख रुपैयाँबराबरको प्रतिशेयर १०० रुपैयाँ अंकित मूल्यका १ करोड ४७ लाख ६४ हजार कित्ता हकप्रद शेयर निष्कासन गर्ने भएको हो ।
हकप्रद शेयर निष्कासन प्रयोजनार्थ कम्पनीले साउन १६ गते बुक क्लोज गरेकाले साउन १५ गतेसम्म नेप्सेमा कारोबार भई कायम शेयरधनीले सो हकप्रद शेयरका लागि आवेदन दिन सक्नेछन् । कम्पनीको हकप्रद शेयरमा असोज ८ गतेसम्म आवेदन दिन सकिनेछ ।
कम्पनीको शेयर निष्काशन तथा बिक्री प्रबन्धक सिटिजन्स क्यापिटल लिमिटेडका अनुसार लगानीकर्ताले बिक्री प्रबन्धकका साथै सिटिजन्स बैंक इन्टरनेशनलका कुमारीपाटी, ठिमी, विराटनगर, बिर्तामोड, वीरगञ्ज, सुर्खेत, जनकपुर, नेपालगञ्ज, नारायणगढ, धनगढी, पोखरा, बुटवल र हेटौँडा शाखा कार्यालयबाट आवेदन दिन सक्नेछन् । त्यस्तै, नेपाल धितोपत्र बोर्डबाट इजाजतप्राप्त सि आस्बा सेवामा सहभागी बैंक तथा वित्तीय संस्थाबाट सि आस्बा प्रणालीमार्फत् पनि आवेदन दिन सक्नेछन् ।
हकप्रद शेयर निष्कासन गरी सङ्कलन भएको रकम कम्पनीले बैंकहरूको ऋण भुक्तानीका लागि प्रयोग गर्ने जनाएको छ ।
