काठमाडौंः गत आर्थिक वर्ष २०८१\८२ मा ४२ खर्ब १२ अर्ब रुपैयाँभन्दा बढीको शेयर कारोबार भएको छ । शेयर खरिदबिक्री गर्न हाल देशभर ९२ वटा ब्रोकर कम्पनी सञ्चालनमा छन् ।
गत आर्थिक वर्षमा सबैभन्दा बढी कारोबार गर्ने नासा सेक्युरिटिज रहेको छ । सो कम्पनीबाट एक आर्थिक वर्षमा १ खर्ब २९ अर्ब १८ करोडको खरिद र १ खर्ब २९ अर्ब ४० करोडको शेयर बिक्री भएको छ । नासाले ४० करोड कमिसन उठाएको छ । यो रकमबाट नेप्सेले ८ करोड १३ लाख पाएको छ भने कम्पनीले २७ करोड कमिसन प्राप्त गरेको छ ।
इम्पेरियल सेक्युरिटिजबाट ८३ अर्बको शेयर खरिद र ८७ अर्बको बिक्री भएको छ । यो कारोबारबाट इम्पोरियलले २६ करोड ८८ लाख ब्रोकर कमिसन उठाएको छ । जसमध्ये नेप्सेले ५ करोड ३७ लाख र ब्रोकर कम्पनीले १८ करोड २८ लाख कमिसन प्राप्त गरेका छन् ।
भिजन सेक्युरिटिजबाट ७९ अर्ब ७८ करोडको खरिद र ७७ अर्ब २३ करोडको बिक्री भएको छ ।
गत आर्थिक वर्षमा ६ अर्ब ६८ करोड ३३ लाख ब्रोकर कमिसन सङ्कलन भएको छ । यसमध्ये नेप्सेले १ अर्ब ३३ करोड ६६ लाख र ९२ वटा ब्रोकर कम्पनीले ४ अर्ब ५४ करोड ४६ लाख रुपैयाँ पाएका छन् ।
गत वर्ष ४ अर्ब ७८ करोड ३९ लाख ९५ हजार ५१८ कित्ता शेयर बिक्री र ४ अर्ब ७१ करोड २७ लाख ७ हजार २७२ कित्ता खरिद भएका छन् ।
गत वर्ष नेप्सेमा १६ करोड ६८ लाख कित्ता हकप्रद शेयर, ३ करोड ५० लाख कित्ता आईपीओ, ११ लाख २० हजार कित्ता एफपीओ, ५ करोड १५ लाख कित्ता कर्पोरेट डिबेन्चर र २ करोड ४३ लाख कित्ता बोनस शेयर सूचीकृत भएका छन् ।
गत आर्थिक वर्षमा सबैभन्दा बढी हिमालय रि–इन्स्योरेन्स कम्पनीको शेयर ६ लाख ३१ हजार पटक खरिद बिक्री भएको छ । त्यस्तै नेपाल पूर्वाधार बैंकको ३ लाख ४० हजार, न्यादी पावर समूहको ३ लाख ३४ हजार र अपी पावरको २ लाख ९९ हजार पटक शेयर किनबेच भएको छ ।
सबैभन्दा बढी न्यादीको १२ करोड ६९ लाख कित्ता शेयर किनबेच भएको छ । कुमारी बैंकको १० करोड ७ लाख कित्ता, अपी पावरको ८ करोड ८९ लाख कित्ता, अरुण भ्याली हाइड्रोपावरको ८ करोड ७८ लाख कित्ता र एचआइडीसीएलको ८ करोड ६८ लाख कित्ता शेयर किनबेच भएको छ ।
बजार पूँजीकरणका हिसाबले विशाल बजार सबैभन्दा ठूलो कम्पनी बनेको छ । यो कम्पनीको कुल बजार पूँजीकरण २ खर्ब १५ अर्ब पुगेको छ । त्यस्तै, नेपाल पुनर्बिमा कम्पनीको १ खर्ब ६९ अर्ब, नेपाल दूरसञ्चार कम्पनीको १ खर्ब ५७ अर्ब, नबिल बैंकको १ खर्ब ४६ अर्ब र नागरिक लगानी कोषको १ खर्ब २८ अर्ब बजार पूँजीकरण रहेको छ ।
कारोबार रकमका हिसाबले सबैभन्दा बढी हिमालयन रि–इन्स्योरेन्सको ६८ अर्ब २० करोड, निफ्राको ५२ अर्ब ७१ करोड, न्यादी पावरको ४९ अर्ब २५ करोड र राधी जलविद्युतको ४० अर्ब ५६ करोडको कारोबार भएको छ ।
