खोर्सानेः हालै प्रकाशन भएको माध्यमिक शिक्षा परीक्षा (एसइइ) मा मोरङको सुन्दरहरैंचा–१० स्थित खोर्सानेमा रहेको बालप्रतिभा माध्यमिक विद्यालयका शतप्रतिशत विद्यार्थी उत्तीर्ण भएपछि विद्यालयले विशेष कार्यक्रम गरी विद्यार्थी तथा शिक्षकलाई सम्मान गरेको छ ।
एसईई नतिजामा उत्कृष्ट ग्रेड ल्याउने विद्यार्थीहरू तथा शिक्षकहरूलाई सम्मान गरिएको थियो । सबैभन्दा बढी ए प्लस ग्रेड दिलाउने शिक्षकहरू विषयगत रूपमा सम्मानित हुनुभएको थियो । विज्ञान विषयका शिक्षक योगेन्द्र कार्की, गणित विषयका शिक्षक शैलेन्द्रकुमार देव तथा ऐच्छिक गणितका शिक्षक राकेश पोद्दारलाई विद्यालयले सम्मान गरेको हो ।
परीक्षामा निर्जल श्रेष्ठले ३.९१ जिपिए ल्याउँदै विद्यालय टप गरेकाले सर्वोत्कृष्ट विद्यार्थीको रूपमा विशेष सम्मान प्रदान गरिएको थियो । परीक्षामा सहभागी ३७ जना विद्यार्थीमध्ये २१ जनाले ए प्लस, १५ जनाले ए र १ जनाले बि प्लस ग्रेड प्राप्त गरेको विद्यालयका प्रधानाध्यापक गणेशप्रसाद दाहालले जानकारी दिनुभयो ।
