विराटचोकः शनिबार मोरङको सुन्दरहरैँचामा सम्पन्न तेस्रो मेयर कपको उपाधी आयोजक सुन्दरहरैँचा नगरपालिकाले हात पारेको छ । सुन्दरहरैंचा–१ स्थित पचाम खेल मैदानमा सम्पन्न फाइनल खेलमा पथरीशनिश्चरे नगरपालिकाको फुटबल टिमलाई सुन्दरहरैँचाले १ का विरुद्ध २ गोल गर्दै पराजित गरेको हो ।
खेलको ११ औँ मिनेटमा पथरीशनिश्चरेका जर्सी नं.१० का निरज परियारले खेलमा पहिलो गोल गरेका थिए । सुन्दरहरैँचाका जर्सी नं. १२ का खेलाडी आशिष वनले ३१ औं मिनेटमा आफ्नो टिमको लागि गोल गर्दै खेल बराबरीमा पुर्याएका थिए ।
खेलको ३४ औँ जर्सी नं. १३ का खेलाडी पूजन चौधरीले सुन्दरहरैंचाका लागि गरेको गोल नै निर्णायक बन्न पुग्यो । विजेता टिमले नगद ४ लाख र उपविजेताले नगद २ लाख रुपैयाँका साथमा दुवै टिमले ट्रफी, मेडल र प्रमाणपत्र प्राप्त गरेका छन् ।
फाइनल खेलको म्यान अफ द म्याच सुन्दरहरैँचाका खेलाडी पूजन चौधरी घोषित भई नगद पुरस्कार २ हजार ५ सय प्राप्त गरे । बेस्ट फरवाड पथरीशनिश्चरेका खेलाडी सौर्य रावत, बेस्ट मिड फिल्डर सुन्दरहरैंचाका विवश गुरुङ, बेस्ट गोलकिपर रोशन कार्की, सर्वाधिक गोलकर्ता पूजन चौधरी, बेस्ट डिफेन्डर विजय राई घोषित भई जनही ५ हजार नगद पुरस्कार प्राप्त गरेका छन् ।
त्यस्तै म्यान अफ द सिरिज सुन्दरहरैंचाका खेलाडी सुजन चौधरी घोषित भएका छन् । उनले १० हजार नगद पुरस्कार प्राप्त गरेका छन् ।
फाइनल खेलपछिको समापन कार्यक्रम सुन्दरहरैंचा खेलकुद विकास समितिका सदस्य सचिव खड्गबहादुर श्रेष्ठको अध्यक्षतामा भएको थियो ।
प्रतियोगितामा मोरङका ६ वटा पालिका तथा सुनसरीका २ वटा पालिकाले भाग लिएका थिए ।
तेस्रो सुन्दरहरैंचा मेयर कप फुटबल प्रतियोगिता भोलिदेखि सञ्चालन हुने
