खेमचन्द्र अधिकारी
विराटचोकः नेपालकै दोस्रो होची महिलाको परिचय बनाउनुभएकी मालती ऋषिदेव मोरङको सुन्दरहरैंचा नगरपालिका वडा नम्बर ४ मा बसोबास गर्नुहुन्छ ।
आजभन्दा ७ वर्षअघि उहाँ नेपालकै दोस्रो होची महिला भएको प्रमाणित भएको हो । त्यसबेला १९ वर्षको उमेरमा उहाँको उचाइ ३२ इन्च र तौल १४ केजी थियो । तत्कालीन नगरप्रमुख शिवप्रसाद ढकालले पत्रकार सम्मेलन गरी ऋषिदेव नेपालकै होची महिला भएको घोषणा गर्नुभएको थियो । लगत्तै सो रेकर्ड विराटनगरकी एक महिलाले तोड्नुभएको थियो । उहाँको लम्बाइ ३१ इन्च थियो ।
बाबु रमेशकुमार मरर र आमा मीनादेवीकी पहिलो सन्तान मालतीलाई नागरिकता परिचयपत्र बनाउनको लागि चाहिने सिफरिश लिन वडा कार्यालयमा आमाले लिएर आएपछि मालतीको उचाइको बारेमा तत्कालीन वडाध्यक्ष शैलेन्द्र श्रेष्ठ र नगरप्रमुख शिवप्रसाद ढकालले चासो लिनुभएको थियो ।
मालतीका बाबु रमेशका अनुसार जन्मिएपछि १ वर्षसम्म सामान्य अवस्था भए पनि त्यसपछि उचाइ बढ्ने क्रम लगभग रोकिएको थियो ।
२०७४ साल माघ १४ गते मालतीलाई नेपालकै दोस्रो होची महिला घोषणा गरिएको थियो । तत्कालीन नगरप्रमुख ढकालका अनुसार पालिकाले आन्तरिक स्रोतबाट खर्च हुने गरी मालतीलाई मासिक २ हजार रुपैयाँ सामाजिक सुरक्षाबापत दिने व्यवस्था मिलाइएको थियो । अहिले भने सो रकम नगरपालिकाले उपलब्ध गराउन छाडेको छ ।
२०५६ भदौ १८ गते जन्मिएकी मालती निरक्षर हुनुहुन्छ ।
