पथरीः लाहा खेतीलाई प्रवर्द्धन गर्न मिडियाले भूमिका खेल्नुपर्नेमा लाहा विज्ञ तथा जिल्ला वन कार्यालयका पदाधिकारीले बताउनुभएको छ । शनिबार पथरीमा आयोजित अन्तरक्रिया कार्यक्रममा यस्तो बताइएको हो ।
नेपालमा लाहा उत्पादन हुने धेरै क्षेत्र भए पनि लाहाको उपयोगिता थाहा नहुँदा त्यत्तिकै खेर जानुका साथै विदेशबाट प्रशोधित लाहा ल्याउँदा नेपाली रुपैयाँ पनि विदेश गइरहेको लाहा विज्ञको भनाइ छ ।
नेपाल पत्रकार मञ्च पथरीको आयोजना तथा डिभिजन वन कार्यालय मोरङको आर्थिक सहयोगमा भएको कार्यक्रमको प्रमुख अतिथि डिभिजन वन कार्यालय मोरङका प्रमुख उत्सव थापा रहनुभएको थियो । डिभिजन वन कार्यालय मोरङका पूर्वप्रमुख विष्णुलाल घिमिरे र लाहा खेती गर्ने किसान डम्बर विश्वकर्माले लाहा खेती, नेपालमा यसको अवस्था र सम्भावनाबारे पत्रकारलाई जानकारी दिनुभएको थियो ।
डिभिजन वन कार्यालय मोरङका पूर्वप्रमुख विष्णुलाल घिमिरेले हाल झापा र मोरङका विभिन्न स्थानमा लाहा खेती विस्तार भइरहेको जानकारी गराउँदै लाहाबाट चप्रा उत्पादन गरी शृङ्गार सामग्री, औषधीजन्य सामग्री र फर्निचरमा लगाउने रङ निर्माण गर्न सकिने उहाँको भनाइ थियो ।
झापाको गौरादहका लाहा किसान विश्वकर्माले नेपालमा लाहा खेतीको व्यावसायिक सम्भावना रहेको जानकारी दिनुहुँदै सुनसरीदेखि झापासम्मको चुरे क्षेत्रमा लाहा खेती गर्न सकिने बताउनुभयो । पहाडी क्षेत्रमा नदीको आसपासको भूभागमा यसको खेती गर्न सकिने उहाँले जानकारी दिनुभयो । धनकुटाको चौबिसे, साँगुरीगढी, मोरङको लेटाङलगायतका वन क्षेत्रमा लाहा प्रशस्त पाइने उहाँको भनाइ थियो ।
खयर, बयर र मौवा प्रजातिका रुखका साथै व्यावसायिक खेती गर्दा सामिया लता जातको बिरुवामा लाहा कीरा लगाएर खेती गर्न सकिने उहाँले जानकारी दिनुभयो ।
