विराटचोकः नेपाल आयल निगमले डिजेल र मट्टीतेलको मूल्य १ रुपैयाँ घटाएको छ । निगम सञ्चालक समितिको बिहीबार बसेको बैठकले बिहीबार मध्यरातदेखि लागू हुने गरी डिजेल र मट्टितेलको मूल्य घटाएको हो ।
मूल्य समायोजनसँगै पहिलो वर्गका लागि डिजेल प्रतिलिटर एक सय ४७ रुपैयाँ ५० पैसा, दोस्रो वर्गका लागि एक सय ४९ रुपैयाँ र तेस्रो वर्गका लागि प्रतिलिटर एक सय ५० रुपैयाँ कायम भएको छ । निगमले चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज डिपो पहिलो वर्ग, सुर्खेत र दाङ दोस्रो वर्ग तथा काठमाडौँ, पोखरा र दिपायलस्थित डिपोलाई तेस्रो वर्गमा वर्गीकरण गरेको छ ।
इन्डियन आयल कर्पोरेसनबाट प्राप्त नयाँ खरिद मूल्यअनुसार प्रतिलिटर पेट्रोलमा २५ पैसा र डिजेलमा १ रुपैयाँ ४ पैसा घटेर आएकाले मूल्य समायोजन गरिएको निगमले जनाएको छ ।
भारतबाट खाना पकाउने एलपी ग्यासको मूल्य बढेर आएको भए पनि निगमले भने पुरानै मूल्यलाई निरन्तरता दिएको छ ।
