लेटाङः सेवाग्राहीको सहजताका लागि लेटाङ नगरपालिकाले नगरका पहाडी वडामा वडा कार्यालयबाटै सामाजिक सुरक्षा भत्ता वितरण गर्न थालेको छ ।
जसअन्तर्गत पूर्ण रुपमा पहाडी भूगोल भएको वडा नम्बर ७ का सेवाग्राहीलाई वारांगीस्थित वडा कार्यालयबाट भत्ता वितरण गरिएको छ । नगर प्रमुख भुपेन्द्रकुमार लावतीका अनुसार यसअघि लेटाङ बजारस्थित एसआइसी एशिया बैंकमा भत्ता लिन जाँदा २ दिनसम्म लाग्ने गरेको र यातायात, खाना र खाजा खर्च धेरै हुने गरेकोमा त्यसको बचत भएको छ ।
जनप्रतिनिधिले चुनावमा गरेको वाचा पूरा गर्ने क्रममा सो काम शुरु गरिएको उहाँले बताउनुभयो । तत्काल वर्षमा २ पटक र आगामी वर्षदेखि हरेक चौमासिकमा वडाबाट भत्ता वितरण गर्ने नगरपालिकाको योजना रहेको उहाँको भनाइ थियो ।
वडाध्यक्ष खगेन्द्र लिम्बूले आगामी दिनमा वडासम्म आउन नसक्ने सेवाग्राहीलाई टोलटोलमै पुगेर सेवा दिने बताउनुभयो ।
सामाजिक उत्तरदायित्वको भावना अनुसार वडा कार्यालयमै पुगेर सेवा प्रदान गरेको बैंकले जनाएको छ । भत्ता वितरणका लागि नगरपालिकाको सामाजिक सुरक्षा शाखाका कर्मचारी, नगर प्रहरी र नेपाल प्रहरीको टोली वारांगी पुगेको थियो ।
वडा नम्बर ७ मा सामाजिक सुरक्षा भत्ता लिने सेवाग्राही २ सय ९६ जना रहेको नगरपालिकाले जनाएको छ ।
