विराटचोकः आज देशभर साधारणतया बदली रहने मौसम पूर्वानुमान महाशाखाले जनाएको छ । देशका हिमाली तथा पहाडी भू–भागका केही स्थानमा मेघगर्जन र चट्याङसहित मध्यमसम्म वर्षा तथा हिमपात हुने सम्भावना रहेको पनि महाशाखाले जनाएको छ ।
जल तथा मौसम विज्ञान विभागका अनुसार गत २४ घण्टामा सिन्धुपाल्चोकको मेलम्ची घ्याङमा सर्वाधिक अर्थात् १०७.२ मिलिमिटर वर्षा भएको छ । त्यस्तै, ताप्लेजुङको तापेथोकमा १०३.४ मिलिमिटर वर्षा भएको छ ।
विभागका अनुसार आज बागमती, गण्डकी र लुम्बिनी प्रदेशका तराई भू–भागका केही स्थानमा पनि मेघगर्जन र चट्याङसहित मध्यमसम्म वर्षा हुने अनुमान गरिएको छ ।
मधेस प्रदेश तथा कोशी र सुदूरपश्चिम प्रदेशका तराई भू–भागका थोरै स्थानमा पनि वर्षाको सम्भावना रहेको छ ।
कोशी, बागमती, गण्डकी र लुम्बिनी प्रदेशका पहाडी भू–भागका एक–दुई स्थानमा भारी वर्षा हुन सक्ने सम्भावना रहेको जनाइएको छ ।
