सलकपुरः श्रीकृष्ण प्रणामी युवा परिषद प्रारम्भिक समिति सलकपुरले खुला रक्तदान तथा छात्रवृत्ति वितरण कार्यक्रम सम्पन्न गरेको छ । सुन्दरहरैंचा– ८ सलकपुरमा मंगलबार प्रमुख अतिथि सुन्दरहरैचा नगरपालिकाका पूर्व नगर प्रमुख शिवप्रसाद ढकालको आतिथ्यतामा कार्यक्रम भएको हो ।
नेपाल रेडक्रस सोसाइटी धरानको प्राविधिक सहयोग रहेको कार्यक्रममा ६८ जनाले रक्तदान गरेका थिए ।
कार्यक्रममा ४ जना जेहेन्दार विद्यार्थीलाई छात्रवृत्ति प्रदान गर्नुका साथै स्टेशनरी सामग्री वितरण गरिएको थियो ।
युवा प्रोत्साहन कार्यक्रमअन्तर्गत भुल्के युवा समाजले सलकपुरमा गरिरहेको सलकपुर खुला क्रिकेट प्रतियोगितालाई ५ हजार रुपैयाँ सहयोग गरेको श्रीकृष्ण प्रणामी युवा परिषद प्रारम्भिक समिति सलकपुरका अध्यक्ष प्रीतम गौतमले बताए ।
श्रीकृष्ण प्रणामी युवा परिषद् नेपालको ३४ औँ स्थापना दिवसको अवसर पारेर भएको कार्यक्रममा सुन्दरहरैंचा वडा नं ८ का वडाध्यक्ष खेमप्रसाद न्यौपाने, सुन्दरहरैँचा उद्योग वाणिज्य संघका अध्यक्ष कृष्णप्रसाद रिजाल, श्रीकृष्ण प्रणामी युवा परिषद नेपालका केन्द्रीय उपाध्यक्ष टंकप्रसाद ओझा, केन्द्रीय विपत व्यवस्थापन समितिका संयोजक यज्ञ ढकाल अतिथिको रुपमा रहेका थिए ।
