इटहरीः सुनसरीको इटहरीमा रहेको दिगो चार्ज प्वाइन्टमा सौर्य ऊर्जामा आधारित ब्याट्री ऊर्जा भण्डारण प्रणाली विकास गर्न दिगो ग्रुप र घाम पावरले रणनीतिक साझेदारी गरेका छन् ।
दुवै कम्पनीबीच ब्याट्री इनर्जी स्टोरेज सिस्टम (बीईएसएस) विकाससम्बन्धी सम्झौता भएको हो । यो सहकार्यले विद्युतीय सवारी साधन चार्जिङ पूर्वाधारलाई स्वच्छ, भरपर्दो र दिगो बनाउने अपेक्षा गरिएको छ ।
सो परियोजनाअन्तर्गत सौर्य ऊर्जा उत्पादन प्रणालीलाई अत्याधुनिक ब्याट्री भण्डारण प्रविधिसँग एकीकृत गरेर उच्च विद्युत् माग हुने समयमा राष्ट्रिय प्रशारण प्रणालीमाथिको निर्भरता घटाउनुका साथै विद्युतीय सवारीसाधन चार्जिङमा नवीकरणीय ऊर्जाको प्रयोग बढाइने बताइएको छ ।
प्रस्तावित प्रणालीले दिउँसो सोलारबाट उत्पादन भएको अतिरिक्त विद्युत् ब्याट्रीमा सञ्चय गर्नेछ । सञ्चित ऊर्जा आवश्यकताअनुसार विद्युतीय सवारी साधन चार्ज गर्न प्रयोग गरिने भएको छ । यसले चार्जिङ केन्द्रमा ऊर्जा आपूर्तिको विश्वसनीयता बढाउने, बिजुलीको प्रभावकारी उपयोग गर्ने र अविरल चार्जिङ सेवा सञ्चालनमा सहयोग पुर्याउने अपेक्षा गरिएको छ ।
दिगोका एकीकृत ऊर्जा समाधानतर्फका व्यवसाय प्रमुख नवीन अधिकारीले घाम पावरसँगको सहकार्य नेपालमा दिगो विद्युतीय सवारीसाधन इकोसिस्टम निर्माण गर्ने अभियानको महत्त्वपूर्ण उपलब्धि भएको बताउनुभयो ।
घाम पावरका प्राविधिक निर्देशक प्रदीप हुमागाईंले सौर्य ऊर्जा र ब्याट्री भण्डारण प्रणालीको संयोजनले ऊर्जा दक्षता बढाउनुका साथै नेपालमा विद्युतीय सवारीसाधन चार्जिङ पूर्वाधार सुदृढ बनाउन योगदान पुग्ने बताउनुभयो ।
इटहरीमा विकास गरिने परियोजनालाई भविष्यमा देशभर स्थापना हुने स्वच्छ ऊर्जामा आधारित विद्युतीय सवारीसाधन चार्जिङ केन्द्रका लागि नमुना परियोजनाका रूपमा विस्तार गर्ने लक्ष्य राखिएको बताइएको छ ।
