विराटचोकः फिफा विश्वकपअन्तर्गत इंग्ल्यान्डले क्रोएसियालाई ४–२ गोलले पराजित गरेको छ । मध्यान्तरअघिको खेल २–२ गोलको बराबरीमा सकिएकोमा मध्यान्तरपछि इंग्ल्याण्डले थप २ गोल गरेपछि उसले ४–२ को नतिजा निकाल्दै ३ अंक जोडेको हो ।
इंग्ल्याण्डका लागि कप्तान ह्यारी केनले दुई गोल अनि जुड बलिङहम र मार्कुस रासफोर्डको एक–एक गोल गरेका थिए ।
डालास स्टेडियममा भएको खेलमा इंग्ल्याण्डका कप्तान ह्यारी केनले १२ औं मिनेटमा पेनाल्टीमा गोल गरेका थिए । केनले सुरुमा प्रहार गरेको पेनाल्टी क्रोएसियाका गोलकिपर डोमिनिक लिभाकोभिचले बचाएका थिए । तर केनले बल प्रहार गर्नुअघि नै लिभाकोभिक अगाडि बढेको देखिएपछि पुनः पेनाल्टी प्रहार गरिएको थियो र केनले सहजै गोल गरेका थिए ।
त्यसपछि क्रोएसियाका मार्टिन बाटुरिनाले ३६ औं मिनेटमा बराबरी गोल फर्काएका थिए । फेरि इंग्ल्याण्डका केनले ४२ औं मिनेटमा डेक्लान राइसको कर्नरमा गोल गर्दै इंग्ल्यान्डलाई २–१ को अग्रता दिलाएका थिए । मध्यान्तरअघिको इन्जुरी समयमा क्रोएसियाका पिटर मुसाले गोल गरी खेललाई बराबरीको स्थितिमा फर्काएका थिए ।
मध्यान्तरपछि खेल शुरु हुनासाथ अर्थात् खेलको ४७ औं मिनेटमा जुड बलिङहमले गोल गर्दै इंग्ल्यान्डलाई ३–२ को अग्रता दिलाए । उनले एलिएट एन्डरसनको पासमा गोल गरेका थिए ।
खेलको ८५ औँ मिनेटमा मार्सक रासफोर्डले इंग्ल्यान्डका लागि चौथो गोल गरेका थिए ।
