विराटनगरः कोशी प्रदेश सरकारले नवप्रवर्तनकारी सोच भएका युवा तथा नयाँ उद्यमीहरूलाई प्रोत्साहन गर्न बीउपूँजी उपलब्ध गराउने प्रक्रिया अघि बढाएको छ । उद्योग, कृषि तथा सहकारी एक सार्वजनिक सूचना जारी गर्दै नयाँ उद्यम गर्न चाहनेहरूबाट परियोजना प्रस्ताव माग गरेको हो ।
‘स्टार्टअप उद्यम बीउपूँजी परिचालन कार्यविधि, २०८२’ बमोजिम योग्यता पुगेका इच्छुक उद्यमीहरूलाई आवेदन दिन आग्रह गरिएको छ । नवीनतम् ज्ञान, सोच, सीप र क्षमता भएका उद्यमीहरूले विराटनगरस्थित मन्त्रालय वा आफूलाई पायक पर्ने जिल्लास्थित घरेलु तथा साना उद्योग कार्यालयहरूमा प्रस्ताव पेश गर्न सकिने बताइएको छ ।
स्वीकृत कार्यविधि अनुसार विशेषगरी कृषि, पर्यटन, सूचना प्रविधि र उत्पादनमूलक क्षेत्रमा नयाँ र सिर्जनशील काम गर्न चाहने स्टार्टअपहरूलाई प्राथमिकता दिइनेछ । कार्यविधिको दफा ४ बमोजिम तोकिएको मापदण्ड पूरा गरेका र अनुसूची–१ मा उल्लेखित क्षेत्रका उद्यमहरू मात्र यसका लागि योग्य मानिने जनाइएको छ । छनोट प्रक्रियालाई पारदर्शी बनाउन मन्त्रालयले विज्ञ टोलीमार्फत प्रस्तावहरूको मूल्याङ्कन गर्ने व्यवस्था गरिएको जनाएको छ ।
आवेदनसँगै उद्यमीले आफ्नो व्यवसायको विस्तृत योजना, लागत अनुमान र अपेक्षित उपलब्धिको खाका पेश गर्नुपर्ने भएको छ । मन्त्रालय स्रोतका अनुसार, छनोट भएका प्रत्येक स्टार्टअपले आफ्नो परियोजनाको प्रकृति र आवश्यकता हेरी अधिकतम ५ लाख रुपैयाँसम्म बीउपूँजी प्राप्त गर्न सक्नेछन्। यो रकम किस्ताबन्दीमा उपलब्ध गराइने र यसको सदुपयोगको नियमित अनुगमन समेत गरिने कार्यविधिमा उल्लेख छ ।
वैदेशिक रोजगारीबाट फर्केका युवा र स्वदेशमै केही गर्न चाहने जनशक्तिलाई उद्यमतर्फ आकर्षित गर्न यो कार्यक्रम ल्याएको बताइएको छ ।
