दाङः चर्चित गायिका, पूर्व सांसद तथा सञ्चारकर्मी कोमल वलीका बुबा ललितबहादुर वलीको हिजो निधन भएको छ । ८५ वर्षीय ललितको दाङस्थित घरको छतबाट खसेर निधन भएको हो ।
शुक्रबार दाङको तुलसीपुरस्थित आफ्नै निवासको छतमा घाम ताप्न जाने क्रममा लडेर ललितको निधन भएको हो ।
स्वर्गीय ललितबहादुर वली दाङको साहित्यिक र सामाजिक क्षेत्रका एक सक्रिय व्यक्तित्व थिए । वि.सं. १९९८ मंसिर १५ गते जन्मिएका उनका ‘दर्पण’ (राष्ट्रिय गीत सङ्ग्रह) र ‘मातृभूमि’ (कविता सङ्ग्रह) गरी दुईवटा कृति प्रकाशित छन् । उनका सातवटा गीतहरू रेडियो नेपालमा रेकर्ड भएका छन् ।
उनका देउसी भैलो, तीजगीत र भजनहरू रेकर्ड भएका हुन् । गायिका कोमल वलीका धेरै गीतहरूमा ललितले मोडलिङ समेत गरेका छन् । स्वर्गीय ललित दाङ ज्येष्ठ नागरिक जिल्ला सङ्घको सदस्य, दाङ साहित्य प्रतिष्ठान, सङ्गीत नाट्य प्रतिष्ठान र पृथ्वीनारायण शाह प्रतिष्ठान तुलसीपुरको सदस्य थिए ।
