विराटचोकः चुनावी परिणामसँगै उत्साही भएका शेयर लगानीकर्ताले नेपालको शेयर बजारलाई लगातार हरियो झण्डा देखाइरहे । आज प्रि ओपनमै राम्रो अंकले बढेको शेयर बजार त्यसपछिका सर्किट ब्रेक पनि पार गर्दै ६ प्रतिशत बढेपछि १२ बजेर १ मिनेट जाँदा नै आजका लागि कारोबार बन्द भएको छ ।
निर्वाचनको परिणामअनुसार रास्वपाको स्पष्ट बहुमतको सरकार बन्ने भएपछि शेयर बजारका लगानीकर्ता उत्साहित हुँदा आज बजार खुलेदेखि नै लगातार शेयर बजार बढेर २ मिनेट हाराहारीमात्रै कारोबार भएको हो ।
बजार खुले लगत्तै ४ प्रतिशतले बढेको नेप्सेले २० मिनेटका लागि कारोबार स्थगन गरेको थियो । त्यसपछि खुलेको बजारमा फेरि आधा मिनेट कारोबार नभई ५ प्रतिशतले नेप्से बढेपछि दोश्रो सर्किट लागेर ४० मिनेटका लागि कारोबार स्थगित भयो ।
४० मिनेटपछि खुलेको बजार फेरि आधा मिनेट कारोबार नभई थप १ प्रतिशत बढेर छ प्रतिशतको वृद्धि भएपछि आजका लागि कारोबार स्थगित भएको हो ।
आज बजार १६२ दशमलव ९३ अंकले बढेर २८७५ दशमलव ४३ को अङ्कमा अडिएको हो ।
आज कारोबारमा आएकामध्ये रिलायन्स स्पिनिङ मिल्सको मात्रै शेयरमूल्य घट्यो । जम्मा १० कित्ता कारोबार भएको सो कम्पनीको शेयरमूल्य साढे १ प्रतिशत घटेको हो ।
बढेको बजारमा व्यापार समूह सबैभन्दा बढी ७.७३ प्रतिशतले बढ्यो भने लगानी समूहमा ७.०६ प्रतिशतले बढ्यो । बैंकिङ समूह ६ दशमलव ९२ प्रतिशत र जलविद्युत समूह ६ दशमलव ८१ प्रतिशतले बढे ।
५ प्रतिशतले बढेको बजारमा २९ कम्पनीको शेयरमूल्य ९ प्रतिशतभन्दा बढीले बढेको छ ।
५५ करोड ५९ लाख रुपैयाँको शेयर कारोबार भएको बजारमा नारायणी डेभलपमेन्ट बैंकको उच्च कारोबार भएको छ । रिडी हाइड्रोको सबैभन्दा धेरै ५४ हजार १६८ कित्ता शेयर कारोबार भएको छ ।
