मादीः संखुवासभाको मादी नगरपालिका वडा नम्बर ३ मूलखर्कमा आयोजित प्रथम ‘मझिया स्मृति कप २०८३’ आमन्त्रित ९ ए साइड महिला फुटबल प्रतियोगिताको उपाधि ललितपुरको सातदोबाटो युथ क्लबले जितेको छ । फेदाप गाउँपालिका उपविजेता बनेको छ ।
आज सम्पन्न फाइनलमा तेह्रथुमको फेदाप गाउँपालिका, पोक्लावाङलाई टाइब्रेकरमा ४–३ गोलअन्तरले पराजित गर्दै सातदोबाटोले उपाधि हात पारेको हो । निर्धारित समयमा दुवै टोलीले गोल गर्न नसकेपछि खेलको निर्णय टाइब्रेकरबाट गरिएको थियो ।
उपाधिसँगै सातदोबाटोले तीन लाख रुपैयाँ नगद पुरस्कारसहित ट्रफी, मेडल र प्रमाणपत्र प्राप्त गरेको छ । उपविजेता फेदाप गाउँपालिकाले एक लाख ५० हजार रुपैयाँसहित ट्रफी, मेडल र प्रमाणपत्र पाएको छ ।
प्रतियोगिताको सर्वोत्कृष्ट खेलाडी सातदोबाटोकी कप्तान वर्षा मगर घोषित भइन् । उनले २१ हजार रुपैयाँ पुरस्कार प्राप्त गरिन् । त्यस्तै, सर्वाधिक गोलकर्ताको उपाधि ओखलढुंगाको पदमा स्पोट्र्स क्लबकी सिम्राङ गुरुङले प्राप्त गरिन् । उत्कृष्ट गोलरक्षक सातदोबाटोकी अस्मिता नेपाली घोषित भइन् । सर्वाधिक गोलकर्ता र उत्कृष्ट गोलरक्षकले जनही १० हजार रुपैयाँसहित मेडल र ट्रफी प्राप्त गरे ।
प्रतियोगिताको समापन समारोहमा प्रतिनिधिसभा सदस्य डा. अर्जुनकुमार कार्की प्रमुख अतिथि तथा मझिया मानबहादुर जिमी स्मृति प्रतिष्ठानका अध्यक्ष रामकुमार जिमी सभाध्यक्ष रहेका थिए ।
स्वर्गीय मानबहादुर जिमी ‘मझिया’को स्मृतिमा आयोजित प्रतियोगिता मझिया मानबहादुर जिमी स्मृति प्रतिष्ठानको आयोजना तथा हाङ्थुम क्लबको सहआयोजनामा सम्पन्न भएको हो । प्रतियोगितामा आठ टोली सहभागी थिए ।
आजको खेलमा उत्कृष्ट प्रदर्शन गरेकी फेदापकी गोलरक्षक करुणा बुढाथोकी प्लेयर अफ द म्याच घोषित भइन् ।
प्रतिष्ठानका अनुसार प्रतियोगिता प्रत्येक तीन वर्षको अन्तरालमा आयोजना गरिनेछ ।
यसअघि शुक्रबारका लागि तय गरिएको फाइनल खेल निरन्तर वर्षा र प्रतिकूल मौसमका कारण स्थगित भएको थियो ।
