काठमाडौंः पत्रकार एवं लेखक विराट अनुपमद्वारा लिखित पुस्तक ‘पहिलो आमनिर्वाचन २०१५’ सार्वजनिक भएको छ । मंंगलबार राजधानीको उमोजा क्याफेमा विभिन्न मिडियाका सक्रिय पत्रकारहरुद्वारा संयुक्त रूपमा पुस्तकको विमोचन भएको हो ।
लेखक अनुपमले पहिलो आमनिर्वाचनमा भएको रोचक कुराहरू पुस्तकमा समावेश भएको सुनाए । नेपाली राजनीतिका ‘हेभिवेट’ को पराजय, उक्त चुनावलाई राष्ट्रिय–अन्तराष्ट्रिय मिडियामा भएको कभरेज, बीपी–महेन्द्रबीचको दूरीलगायतका विषयहरू पुस्तकमा रहेको उनले बताए ।
सो पुस्तकमा पहिलो चुनावमा १०९ वटै क्षेत्रको परिणाम, सबै दलका घोषणापत्र लगायतका दस्ताबेज सङ्ग्रह गरिएको छ भने सो चुनावमा सहभागी भएका उम्मेदवार, मतदातालगायतको प्रत्यक्ष संवाद समेत समेटिएको छ ।
अनुपमले यसअघि डोरबहादुर बिस्टद्वारा लिखित अङ्ग्रेजी किताब ‘रिपोर्ट फर्म ल्हासा’को नेपाली अनुवाद ‘ल्हासाको खबर’ सार्वजनिक गरेका थिए ।
