विराटचोकः फागुन २१ गते हुने प्रतिनिधिसभा निर्वाचनको मतगणना सम्बन्धित निर्वाचन क्षेत्रमै हुने प्रदेश निर्वाचन कार्यालयले जनाएको छ ।
मोरङका ६ वटै निर्वाचन क्षेत्रको मतगणना अलग–अलग स्थानमा हुने भएको छ । यसअघि मोरङका ४, ५ र ६ को आदर्श मावि र अन्य क्षेत्रको सम्बन्धित क्षेत्रमा मतगणना हुँदै आएको थियो ।
प्रदेश निर्वाचन अधिकारी चोलाराज दंगालका अनुसार यस पटक मोरङ क्षेत्र नं. १ को मतगणना उर्लाबारी नगरपालिकाको कार्यालयमा हुने भएको छ ।
क्षेत्र नम्बर २ को मतगणना विश्वनाथ मन्दिर सिँजुवामा, क्षेत्र नम्बर ३ को मतगणना भगवती मावि बेलबारीमा र क्षेत्र नम्बर ४ को मतगणना जनता नमुना मावि विराटनगरमा हुने भएको छ ।
त्यस्तै, क्षेत्र नम्बर ५ को मतगणना सुनसरी–मोरङ सिंचाइ आयोजनाको कार्यालयमा र क्षेत्र नम्बर ६ को मतगणना आदर्श माविमा हुने भएको छ ।
जिल्लामा ३०६ मतदान स्थलमा ८८८ मतदान केन्द्र र दुई अस्थायी मतदान केन्द्र रहेका छन् ।
