विराटचोकः नेपाली कांग्रेसका सभापति गगन थापालाई निर्वाचनमा पराजित गर्न कांग्रेस नेता डा. शेखर कोइराला लागेको आरोप लागेपछि कोइरालाको सचिवालयले त्यसको खण्डन गरेको छ ।
सर्लाही ४ मा उम्मेद्वार रहेका थापालाई हराउन मोरङ ६ मा उम्मेद्वार रहेका कोइरालाले स्वकीय सचिव दिनेश थपलियामार्फत् मान्छे परिचालित गरेको खबर हिजो साँझ रातो पाटी अनलाइनले प्रकाशित गरेको थियो । रातो पाटीले अडियो रेकर्डसहितको सामग्री प्रकाशन गरेको हो ।
रातो पाटीले हिजो राति ११ बजेर ५५ मिनेट जाँदा प्रकाशन गरेको समाचारको खण्डन गर्दै सचिवालयले आज बिहान साढे ५ बजे विज्ञप्ति प्रकाशित गरेको हो । विज्ञप्तिमा सो अनलाइनले भ्रामक र कपोलकल्पित समाचार प्रकाशन गरेको भनी खण्डन गरिएको छ ।
कोइरालाको सचिवालयले निकालेको प्रेस विज्ञप्ति जस्ताको तस्तै
प्रेस विज्ञप्ति
हालै रातो पाटी अनलाइनमा प्रकाशित समाचारमा मेरो नाम जोडेर गरिएको आरोप प्रति मेरो गम्भीर ध्यानाकर्षण भएको छ । उक्त समाचारमा मलाई डा. शेखर कोईराला ज्यूको स्वकीय सचिवको हैसियतमा विभिन्न राजनीतिक गतिविधिमा संलग्न भएको, विशेष गरी पार्टी सभापति श्री गगनकुमार थापा ज्युलाई निर्वाचनमा हराउन षड्यन्त्रमा भूमिका खेलेको भन्ने आरोप लगाइएको छ । यस सम्बन्धमा म स्पष्ट रूपमा भन्न चाहन्छु कि उक्त समाचारमा उल्लेख गरिएका सम्पूर्ण आरोपहरू पूर्णतः तथ्यहीन, भ्रामक र कपोलकल्पित हुन् ।
म एक जिम्मेवार नेताको स्वकीय सचिवको रूपमा कार्यरत व्यक्तिले यस्ता कुराको कल्पना सम्म पनि गर्न सक्दिन । मेरो भूमिका सधैं संगठनको मूल्य, मान्यता, अनुशासन र नेतृत्व प्रतिको निष्ठामा आधारित रहेको छ । आफ्नो नेता, संगठन र पार्टीको प्रतिष्ठामा आँच आउने कुनै पनि गतिविधिमा संलग्न हुनु त परको कुरा, त्यस्तो सोच समेत राख्नु मेरो नैतिकता, पेशागत धर्म र व्यक्तिगत चरित्र विपरीत छ ।
समाचारमा उल्लेख गरिएको तथाकथित नाम गरेका व्यक्ति को हुन् भन्नेबारे मलाई कुनै जानकारी छैन । त्यस्तै उपेन्द्र कुशवाहाज्यू सँग कुनै संवाद भएको छैन। साथै, यसै समाचारमा नाम जोडिएको अमरेश सिंह ज्यूसँग पनि यस प्रकारको कुनै भेट, संवाद भएको छैन भन्ने कुरा म दृढतापूर्वक स्पष्ट गर्न चाहन्छु ।
यस प्रकारका निराधार, अपुष्ट र भ्रामक समाचारले व्यक्तिगत प्रतिष्ठामा मात्र नभई समग्र संगठन, पार्टी र लोकतान्त्रिक अभ्यास माथि नै आघात पु¥याउने कार्य गर्दछ । राष्ट्र र लोकतन्त्र संवेदनशील चरणमा रहेको वर्तमान अवस्थामा यस्ता भ्रमपूर्ण प्रचारले जनविश्वास कमजोर बनाउने र संगठनलाई अनावश्यक रूपमा बदनाम गर्ने काम मात्र गर्दछ ।
अतः यस विषयलाई लिएर म सम्बन्धित सरोकारवाला निकायहरूसँग आवश्यक परामर्श गरिरहेको छु । आवश्यक परेमा प्रकाशित अडियोको स्वतन्त्र फोरेन्सिक परीक्षण गराउने, साथै आफ्नो व्यक्तिगत प्रतिष्ठा र सत्यको रक्षा गर्न कानुनी उपचार खोज्न पनि म बाध्य हुने जानकारी गराउन चाहन्छु ।
अन्त्यमा, सम्पूर्ण पार्टीका सबै तहका नेताहरु, शुभेच्छुक तथा आम जनसमुदायलाई यस्ता अपुष्ट र भ्रमपूर्ण समाचारप्रति सचेत रहन, सत्य र तथ्यमा आधारित सूचनामात्र विश्वास गर्न तथा अफवाहबाट प्रभावित नहुन हार्दिक अनुरोध गर्दछु । सत्य सधैं स्पष्ट हुन्छ, र सत्यको पक्षमा उभिनु नै हाम्रो साझा दायित्व हो ।
दिनेशचन्द्र थपलिया
स्वकीय सचिव
डा. शेखर कोइरालाको सचिवालय
फागुन १५ २०८२
