काठमाडौंः नेपाल पञ्चाङ्ग निर्णायक विकास समितिले शुक्र अस्त भएकै कारण दशैं मनाउन हुँदैन भन्ने प्रचार शास्त्रसम्मत नरहेको जनाएको छ ।
समितिका अध्यक्ष डा पुरुषोत्तम भट्टराईले शारदीय नवरात्र आश्विन शुक्ल पक्षको वार्षिक नित्य कर्म भएकाले शुक्र वा वृहस्पति अस्तले चाड मनाउन फरक नपर्ने बताउनुभयो ।
समितिले शुक्र र वृहस्पति अस्त हुँदा नित्य र नैमित्तिक कर्ममा बन्देज नरहेको भन्दै सामाजिक सञ्जालका हल्लामा नपर्न र जानकारसँग सरसल्लाह गर्न अनुरोध गरेको छ ।
शुक्र र वृहस्पति अस्त हुँदा नित्य र नैमित्तिक कर्म गर्न शास्त्रीय वचनका आधारमा कुनै बन्देज नभएकाले आम मानिसमा सामाजिक सञ्जालका भरमा भ्रममा नपर्न पनि समितिले आह्वान गरेको छ ।
वृहस्पति र शुक्र अस्तका बेला कुनै कामना राखेर गरिने कर्म गर्न मात्र नहुने शास्त्रीय वचन रहेको छ । सामाजिक सञ्जालमा आएका यस्ता हल्लाका पछि लाग्नुपूर्व यस विषयका जानकार धर्मशास्त्रविद् एवं समितिका पदाधिकारीसँग सरसल्लाह, परामर्श गर्न पनि समितिले सम्बद्ध सबैलाई अनुरोध गरेको छ ।
यही असोज २८ गते बुधबार दिउँसो १३ः४० बजे पश्चिममा अस्त भएका शुक्र कात्तिक ११ गते बुधबार मध्यराति १२ः४९ बजे उदय हुने समितिले जनाएको छ ।
