खोटाङः खोटाङको जन्तेढुंगा गाउँपालिका वडा नम्बर ६ दिप्लुङमा बिहे भोज खाएका एक सय जनाभन्दा बढी बिरामी परेका छन् ।
बिरामी परेकाहरूलाई दिप्लुङकै निगालावास भञ्ज्याङ निवासी रामकुमार राईको घरमा शिविर राखेर उपचार गरिएको छ ।
स्थानीयका अनुसार माघ २१ गते विवाह भोज खाएका स्थानीयवासी माघ २२ गते बेलुकादेखि बिरामी पर्न थालेका हुन् । भोज खाएको १२ घण्टापछि शुरुमा ज्वरो आउने, काम्ने र झाडापखाला लाग्ने समस्या देखिएको थियो ।
बेहुला र बेहुलीसमेत बिरामी परेका स्थानीयको उपचारका लागि गाउँपालिकाको स्वास्थ्य शाखाको आरआरटी टिम, स्वास्थ्य कार्यालय र जनप्रतिनिधिको टोली खटिएको स्वास्थ्य शाखा प्रमुख सूर्यबहादुर कार्कीले जानकारी दिनुभएको छ ।
‘फुड प्वाइजन’को कारण पत्ता लगाउनका लागि प्रदेशबाट ‘स्याम्पल’ सङ्कलन गर्न टोली मगाइएको बताइएको छ ।
धेरैजसो बिरामी उपचारपछि घर फर्किएका छन् । भोज खाएर फर्किएकाहरुले पनि आफू बिरामी परेको बताएको गाउँपालिका उपाध्यक्ष खेमबहादुर खड्का बताउनुहुन्छ ।
