ताप्लेजुङः निर्माणाधीन अपर मेवा जलविद्युत आयोजनाको सुरुङ मार्ग खन्ने कार्य शुरु भएको छ ।
मिक्वाखोला गाउँपालिकामा निर्माणाधीन ३१.९२ मेगावाट क्षमताको उक्त जलविद्युत आयोजनाको सुरुङ मार्ग खन्ने कार्य शुरु भएको हो ।
प्रदेशसभा सदस्य तिलकुमार मेन्याङ्बो, जिल्ला समन्वय समिति प्रमुख छिरिङ लामा, फुङलिङ नगर उपप्रमुख भीमादेवी ओझा, मिक्वाखोला–४ र ५ का जनप्रतिनिधि सहितको उपस्थितिमा सुरुङ खन्ने कार्य गरिएको हो । सुरुङ मार्ग निर्माण एक वर्षभित्र पूरा गर्ने लक्ष्य राखिएको छ ।
करीब ६ अर्ब ३७ करोड रुपैयाँ लागतमा निर्माण हुने आयोजनाको प्रवद्र्धक सौर्य होल्डिङ कम्पनी प्रालि रहेको छ । आयोजना निर्माणको निर्माण कार्य ३ वर्षभित्र सम्पन्न हुने जनाइएको छ ।
आयोजनाका लागि मेन एक्सिस टनेल र भेन्टिलेसन मार्गका लागि ब्लास्टिङ गरी सुरुङ मार्ग निर्माण कार्य शुरु गरिएको आयोजनाका जनसम्पर्क अधिकृत कल्याण गौतमले जानकारी दिनुभयो । उहाँका अनुसार करीब ४ किलोमिटर लामो सुरुङ मार्ग हुनेछ ।
