विराटचोकः गीतकार श्रीराम राईको तेस्रो गीत ‘छैन क्यारे मेरो लागि दुख्ने मुटु पनि’ ओसियन म्युजिक नेपालको युट्युब च्यानलबाट सार्वजनिक भएको छ ।
ओमप्रकाश राईले संगीतबद्ध गरेको गीतमा पेमा शेर्पा राईले आवाज भर्नुभएको छ । गीतलाई सन्तोष प्रगाढ राईले एरेन्ज गर्नुभएको छ । गीतको सम्पादन वीरेन्द्र भाट ‘विपिन’ र मिक्सिङ–मास्टरिङ गोविन्द सोनीले गर्नुभएको छ ।
गीतले छोडी जाने व्यक्तिलाई सधैं हाँसोखुसी रहनू भन्दै शुभेच्छा प्रकट गरेको छ ।
रावासावा प्राज्ञिक समाज नेपालका सचिव राई लघुकथा समाज नेपालको पहिलो शाखा खोटाङका अध्यक्ष पनि हुनुहुन्छ ।
यसअघि २०७५ मा शिला खनालको आवाजमा ‘मधुमासमै मिठो साथ छुटेपछि रोएँ’ बोलेको उहाँको गीत रेकर्ड भएको थियो । त्यस्तै २०७९ मा मनमा बि राई र २०८१ मा नवराज पराजुलीको आवाजमा ‘सञ्चो छौ कि बिसञ्चो’ बोलका गीत रेकर्ड भएका थिए ।
दिक्तेल रुपाकोट मझुवागढी–७, सिर्जनाकुञ्ज, दोर्पा, खोटाङका राई पत्रकारिता तथा साहित्यमा सक्रिय हुनुहुन्छ । ‘पोलेको मकै’ (२०७८) र ‘टोली नेता’ (२०७४) उहाँका प्रकाशित दुई बालकथासङ्ग्रह हुन् ।
‘लघुकथा सौन्दर्य’ फेसबुक पेजमार्फत लघुकथा विधाको उन्नयनमा सक्रिय राईका ‘आजका लघुकथा’ (२०७४) र ‘संयोग’ (२०७९) सामुहिक लघुकथासंग्रह प्रकाशित छन् । हालै राईको संयोजन तथा विमल भौकाजीको सम्पादनमा ‘बलेँसी’ सामुहिक लघुकथासङ्ग्रह बजारमा आएको छ ।
