कानेपोखरीः साबिक करदाता सेवा कार्यालयबाट प्रदान हुँदै आएका करसम्बन्धी सेवाहरू अब कानेपोखरी गाउँपालिकामै उपलब्ध हुने गरी शुक्रबारदेखि सेवा शुभारम्भ भएको छ ।
कानेपोखरी गाउँपालिकाको आयोजना तथा आन्तरिक राजस्व कार्यालय दमक र करदाता सेवा कार्यालय पथरीको सहकार्यमा सञ्चालन गरिएको सो सेवाबाट स्थानीय करदाताले अब कर दर्ता, विवरण बुझाउने, परामर्शलगायतका सेवाहरू आफ्नै पालिकाबाट सहज रूपमा प्राप्त गर्न सक्नेछन् ।
सेवा शुभारम्भ कार्यक्रममा जनप्रतिनिधि, सरकारी कार्यालयका प्रतिनिधि, व्यवसायी, करदाता तथा सरोकारवाला निकायको सहभागिता रहेको थियो ।
कार्यक्रममा कानेपोखरी गाउँपालिकाकी अध्यक्ष राजमती इङ्गनामले उत्कृष्ट कर तिर्ने करदातालाई सम्मान गर्ने प्रतिबद्धता व्यक्त गर्नुभएको छ । दमक वा विराटनगर पुगेर कर तिर्नुपर्ने बाध्यता अन्त्य भएको उल्लेख गर्दै उहाँले कर तिर्नु अनिवार्य रहेको विषयमा कर शिक्षासम्बन्धी तालिम तथा जनचेतनामूलक कार्यक्रमसमेत सञ्चालन गरिने बताउनुभयो ।
प्रमुख प्रशासकीय अधिकृत हीराकुमारी यादवले नयाँ सेवाबारे पालिकाभित्रका सबै वडासम्म सूचनाको प्रभावकारी प्रवाह आवश्यक रहेको बताउनुभयो ।
सेवा शुरुसँगै कानेपोखरी गाउँपालिकाले आफ्नो क्षेत्रभित्र बसोबास गर्ने प्राकृतिक व्यक्तिहरूलाई व्यक्तिगत स्थायी लेखा नम्बर (पान) जारी गर्नेछ । स्थानीय ठेगानामा दर्ता भएका व्यवसाय तथा निकायलाई व्यावसायिक स्थायी लेखा नम्बर उपलब्ध गराइने व्यवस्था गरिएको छ । मूल्य अभिवृद्धि करमा दर्ता हुन चाहने व्यवसाय तथा निकायका निवेदन आवश्यक कागजात भिडान गरी सम्बन्धित आन्तरिक राजस्व कार्यालयमा सिफारिश गर्ने र दर्ता प्रमाणपत्र उपलब्ध गराउने प्रावधान पनि समावेश गरिएको छ ।
सेवा सञ्चालनका लागि आवश्यक स्रोत, साधन र जनशक्तिको व्यवस्थापन कानेपोखरी गाउँपालिकाले गर्ने भएको छ । इन्टिग्रेटेड ट्याक्स सिस्टम सञ्चालनका लागि आवश्यक युजर नेम, पासवर्ड, कर्मचारी तालिम तथा प्राविधिक सहजीकरण आन्तरिक राजस्व कार्यालय दमकले उपलब्ध गराउनेछ । सेवा प्रभावकारी बनाउन दुवै पक्षबाट एक–एक जना जिम्मेवार कर्मचारीलाई फोकल पर्सनका रूपमा तोकिने व्यवस्था पनि गरिएको छ ।
