बेलबारीः पुस २५ गतेदेखि बेलबारी उद्योग वाणिज्य संघको आयोजनामा जारी ‘तेस्रो बेलबारी महोत्सव’ मा सात दिनमा ४० हजार दर्शकले अवलोकन गरेका छन् । ५० लाखको कारोबार भएको छ ।
आयोजकका अनुसार महोत्सवको सातौँ दिनसम्म आइपुग्दा करिब ४० हजार दर्शकले अवलोकन गरिसकेका छन् । दर्शकको बाक्लो उपस्थितिसँगै आर्थिक कारोबार पनि सन्तोषजनक रहेको छ । महोत्सवको सातौँ दिनसम्म ५० लाख रुपैयाँभन्दा बढीको व्यावसायिक कारोबार भएको छ ।
महोत्सवमा ५० वटा व्यापारिक स्टल र १५ वटा होटलका स्टल रहेका छन् । महोत्सवलाई रोचक बनाउन दैनिक रूपमा विविध कार्यक्रमहरू आयोजना भइरहेका छन् ।
महोत्सवलाई मनोरञ्जनका साथै चेतनामूलक बनाउने उद्देश्यले आगामी आइतबार हात्तीविज्ञहरूसँग विशेष अन्तरक्रिया कार्यक्रम समेत तय गरिएको छ । उक्त कार्यक्रममा हात्तीको आहारा, यसको संरक्षण र प्राविधिक पक्षबारे विज्ञहरूसँग छलफल गरिने बेलबारी उद्योग वाणिज्य संघका कार्यवाहक अध्यक्ष सन्दीप राईले जनाएका छन् ।
