विराटचोकः विपन्न परिवारका विद्यार्थीलाई उच्च शिक्षामा सहज होस् भनेर र्याप गायक यमबुद्ध (स्व. अनिल अधिकारी)को नाममा मोरङको सुन्दरहरैंचा स्थित सुकुना बहुमुखी क्याम्पसमा अक्षयकोष स्थापना गरिने भएको छ ।
मङ्गलबार यमबुद्ध फाउन्डेशनले सुकुना बहुमुखी क्याम्पसका पत्रकार सम्मेलन गरी दिएको जानकारीअनुसार विपन्न परिवारका जेहेन्दार विद्यार्थीलाई छात्रवृत्ति प्रदान गर्ने गरी अक्षयकोष स्थापना हुन लागेको जानकारी दिएको हो । फाउण्डेसनका अनुसार यमबुुद्धको सपना पूरा गर्न अक्षयकोष स्थापना गर्न यमबुद्धको स्मृति दिवसको अवसर पारेर श्रद्धाञ्जली कार्यक्रमका साथमा साङ्गीतिक कार्यक्रम हुन लागेको हो ।
साङ्गीतिक कार्यक्रममा चर्चित र्याप गायक भिटेन (समीर घिसिङ), मिस्टर डी, टुकी (निरज मल्ल ठकुरी) तथा रोइला रोकाले साङ्गीतिक प्रस्तुति दिने भएका छन् । १८ देखि ३५ वर्षबीचका सङ्गीत पारखी लक्षित साङ्गीतिक कार्यक्रममा ४ हजार स्रोता सहभागी हुने अनुमान आयोजकले गरेको छ ।
कार्यक्रम संयोजक योगेश दाहालका अनुसार लागूऔषध विरुद्ध सचेतना फैलाउने उद्देश्यसमेत बोकेको कार्यक्रमस्थलभित्र धूमपान, मद्यपान तथा अनुशासनविपरीतका सबै गतिविधि पूर्ण रूपमा निषेध गरिनेछ ।
यम बुद्धका बुबा अम्बिकाप्रसाद अधिकारीले कार्यक्रमको उद्देश्य पवित्र रहेको उल्लेख गर्दै सभ्य र अनुशासित ढंगले कार्यक्रम सफल हुनेमा विश्वस्त रहेको बताउनुभयो ।
कार्यक्रममा समाजसेवी सुरेन्द्रबहादुर थापा, सुकुना बहुमुखी क्याम्पसका सहायक क्याम्पस प्रमुख गणेशप्रसाद दाहाल, सुन्दरहरैंचा नगरपालिकाका प्रवक्ता रोशनप्रसाद ढकाललगायतले आफ्ना भनाइ राख्नुभएको थियो ।
