दमकः झापाको कमल गाउँपालिकाबाट कोशी प्रदेश सरकारले पहिलो पटक कोशी घुम्ती अस्पताल सञ्चालनमा ल्याएको छ ।
कोशी प्रदेश सरकारका मुख्यमन्त्री हिक्मतकुमार कार्कीले घुम्ती अस्पतालको शुभारम्भ गर्दै यो सेवालाई गाउँ–गाउँसम्म विस्तार गरिने बताउनुभयो । महामारी फैलिँदा तथा आकस्मिक स्वास्थ्य सङ्कटका बेला तत्काल सेवा पुर्याउन घुम्ती अस्पताल प्रभावकारी हुने विश्वास लिएको उहाँको भनाइ थियो ।
कोशी प्रदेश स्वास्थ्य निर्देशनालयकी नर्सिङ प्रशासक आस्था थापाका अनुसार घुम्ती अस्पतालमा रेडियोलोजी सेवा, मुटुको एक्स–रे, तथा रगतको नमुना सङ्कलन गरी परीक्षण गर्ने उपकरण जडान गरिएको छ ।
मुख्यमन्त्री कार्कीले यो घुम्ती अस्पताल नेपालमै पहिलो र नमुनायोग्य भएको उल्लेख गर्दै यसलाई थप परिष्कृत गरी आम जनतासम्म पु¥याउने तयारी प्रदेश सरकारले गरिरहेको बताउनुभयो ।
प्रदेश सरकारका स्वास्थ्य मन्त्री मानबहादुर लिम्बूले प्रदेश सरकारले जनताले देख्ने गरी स्वास्थ्य क्षेत्रमा काम गरिरहेको बताउनुभयो ।
घुम्ती अस्पताल सञ्चालनका लागि करिब ८० लाख रुपैयाँ खर्च गरिएको स्वास्थ्य निर्देशनालयका निर्देशक ज्ञानबहादुर बस्नेतले बताउनुभयो ।
स्वास्थ्य निर्देशनालयले घुम्ती अस्पताल शुभारम्भकै अवसरमा कमल गाउँपालिकामा स्वास्थ्य शिविरसमेत आयोजना गरेको थियो ।
ठूलो बसभित्र अत्याधुनिक स्वास्थ्य उपकरण जडान गरी घुम्ती अस्पताल सञ्चालन गरिएको हो ।
