विराटचोकः हिजोदेखि दोस्रो बेलबारी महोत्सव शुरु भएको छ । महोत्सवको कोशी प्रदेशका स्वास्थ्य मन्त्री मानबहादुर लिम्बूले उद्घाटन गर्नुभएको छ । आयोजक बेलबारी उद्योग वाणिज्य संघका अनुसार महोत्सवमा दिनहुँ नयाँ नयाँ विषयमा बहस कार्यक्रम हुनेछन् भने साँझमा साङ्गीतिक प्रस्तुति रहने भएका छन् ।
आयोजकका अनुसार आज दोस्रो दिन दिउँसोको बहस कार्यक्रम चलचित्र र ग्रामीण समृद्धि विषयमा रहेको छ । आयोजकका अनुसार ‘चलचित्रबाट ग्रामीण समृद्धितर्फको यात्रा’ शीर्षकमा महोत्सव स्थलमा दिउँसो १२ बजे हुने कार्यक्रममा चलचित्र निर्माता विशाल भण्डारी प्रमुख वक्ताका रूपमा सहभागी हुनुहुने भएको छ । कार्यक्रमको सहजीकरण कलाकार जेबी थुलुङले गर्नुहुने भएको छ ।
आज साँझ दर्शकहरूको मनोरञ्जनका लागि चर्चित ब्यान्ड दि फिरन्तेको प्रमुख साङ्गीतिक प्रस्तुति रहने आयोजकले जनाएको छ ।
