विराटचोकः बेलबारी उद्योग वाणिज्य संघको आयोजनामा आजदेखि माघ ५ गतेसम्म मोरङको बेलबारीमा दोस्रो बेलबारी महोत्सव सञ्चालन हुने भएको छ । कोशी प्रदेशका मुख्यमन्त्री हिक्मतकुमार कार्कीले महोत्सवको उद्घाटन गर्नुहुने भएको छ ।
संघका महासचिव विवेक मिश्रका अनुसार महोत्सवमा बेलबारीका ९ वटै वडाका स्टल महोत्सवमा राखेर स्थानीय तथा कृषि उत्पादनको प्रवद्र्धन गरिने भएको छ ।
संघका सचिव तथा कलाकार व्यवस्थापन संयोजक रुपेश श्रेष्ठका अनुसार महोत्सवभर हरेक साँझ साङ्गीतिक प्रस्तुति पनि रहनेछन् । जसअन्तर्गत पहिलो दिन आज द स्मृति ब्याण्ड र गायक राजनराज शिवाकोटीको आज विशेष प्रस्तुति रहनेछ ।
महोत्सवबाट लगभग ४० लाख रुपैयाँ बचत गरिने र सो रकम संघको भवन निर्माणमा खर्च गरिने आयोजकले जनाएको छ ।
